Aron notar rödd „Karls“ til að tjá sig á hverjum degi

Áhrifa fötlunarinnar gætir meðal annars í vöðvum á munnsvæði og því notar Aron máltækni til tjáningar á hverjum degi, bæði heima og í skólanum.

Aron notar rödd „Karls“ til að tjá sig í gegnum forritið „Communicator“. Röddin er þó helst til of djúprödduð fyrir smekk móður hans, Kolbrúnar Eirar Óskarsdóttur.

„Hann þarf aðstoðar við allar sínar daglegu þarfir. Aron stýrir tölvu með hægri fæti og notar hnapp og forrit sem heitir Communicator og þaðan kemur karlmannsröddin Karl sem talar fyrir hann.“

Þó væri þó óskandi að Aron gæti nýtt sér rödd sem myndi passa ungum dreng betur.

„Það eru til tvær íslenskar raddir; Karl og Dóra, en hann er náttúrulega bara níu ára og röddin er frekar dimmrödduð fyrir níu ára dreng þannig að þegar hann kallar „mamma!“ þá er frekar dimmraddaður karlmaður sem kallar mamma.“

Máltækni skipti gríðarlegu máli fyrir fjölskylduna alla.

„Hugsaðu þér, þegar barnið þitt kemur heim úr skólanum og vill segja frá deginum. Það vill geta sagt frá því sem var gaman eða sagt hvort eitthvað hafi komið upp á. Eins þegar allir eru að gera sig klára á morgnanna, en hann þarf aðstoð við allt, og þá gleyma mamma og pabbi kannski stundum að bursta tennurnar þá stoppar hann okkur af. Hann vill geta sagt frá því þegar hann vill gel í hárið þennan morguninn eða nota rödd til að gera grín að systkinum sínum, til að segja brandara eða taka þátt í umræðum við kvöldverðarborðið. Þetta eru öll þessi litlu atriði sem skipta svo miklu máli.“

Hefur tröllatrú á leikjaiðnaðinum á Íslandi

Kolbrún kveðst bjartsýn á að fleiri lausnir muni líta dagsins ljós.

„Ég held að þetta sé bara rétt að byrja og ef maður á að veðja á eitthvað þá hef ég rosa trú á leikjaiðnaðinum á Íslandi og að framþróun hjá þeim eigi eftir að nýtast á góðan hátt.“

Aron er í Arnarskóla en líka hverfisskólanum Hofsstaðaskóla. Kolbrún segir að þau séu afar heppin með kennara og stuðningsfulltrúa sem vinni vel saman til að mæta þörfum Arons. Kolbrún vill hvetja kennara og samfélagið allt til að nýta tæknina til að bæta líf barna með fötlun.

„Aron hefur kennara sem eru úrræðagóðir og nýta tæknina, en það er alls ekki sjálfsagt að kennarar hafi þekkingu og hæfileika í að gera það en kennararnir hans gera það af mikilli snilld!“

Atvinnulífsráðstefna Almannaróms og Samtaka atvinnulífsins hefst klukkan hálf þrjú en henni verður streymt í beinni útsendingu á Vísi. Kolbrún er ein þeirra sem verður í pallborði á ráðstefnunni.