De Bru­yne spenntur fyrir komu norska markahróksins

Skömmu eftir að síðustu leiktíð í enska fótboltanum lauk tilkynnti Man City að Erling Braut Håland, leikmaður Borussia Dortmund og norska landsliðið, væri á leið til félagsins.

Þó Pep Guardiola hafi skilað Englandsmeistaratitli í hús og verið mínútum frá því að koma Man City í úrslit Meistaradeildarinnar þá var umræðan á þá leið að það skorti hreinræktaðan framherja í leikmannahóp liðsins.

Það mun ekki vanta á næstu leiktíð og hefur belgíski miðjumaðurinn Kevin De Bruyne nú lagt orð í belg. Sá virðist einkar spenntur að spila með framherja sem getur vart hætt að skora.

„Håland er frábær framherji og ætti að hjálpa okkur að vaxa sem lið. Það búast allir við mjög miklu af honum. Man City hefur verið að leita að 9u og ég held það sé gott að fá framherja sem getur skorað 20 til 25 mörk á tímabili,“ sagði De Bruyne sem nú er staddur í landsliðsverkefni með Belgíu.

De Bruyne telur einnig að koma framherjans gæti hjálpað sér þar sem hann hefur oft lagt upp fleiri mörk en á leiktíðinni sem var að ljúka.

Hinn 21 árs gamli Håland er nú þegar með betri framherjum Evrópu. Alls spilaði hann 89 leiki fyrir Dortmund og skoraði 86 mörk ásamt því að leggja upp 23 til viðbótar. Þar áður skoraði hann 29 mörk í 27 leikjum fyrir Red Bull Salzburg í Austurríki ásamt því að leggja upp sjö til viðbótar.

Nú er bara að bíða og sjá hvort hann bjóði upp á svipaða tölfræði í ensku úrvalsdeildinni.