Reynt að brjótast inn í hrað­banka Arion við Valla­kór

Heimir Ríkharðsson, lögreglufulltrúi hjá lögreglunni á höfuðborgarsvæðinu, segir í samtali við fréttastofu að ekki hafi þó tekist að ná peningum úr hraðbankanum.

Hann segir að tilkynning um málið hafi komið inn á borð lögreglu snemma í morgun og sé málið í rannsókn þar sem farið verður yfir upptökur úr öryggismyndavélum.

Samkvæmt upplýsingum fréttastofu virðist sem að slípirokkur hafi verið notaður á hlið hraðbankans og hafi meitill enn staðið út úr hraðbankanum þegar starfsfólk í verslunarkjarnanum mætti til vinnu í morgun.

Hraðbankann er að finna í verslunarkjarna við Vallakór þar sem meðal annars er að finna útibú Apótekarans og verslun Krónunnar.

Þetta er í annað sinn í vikunni þar sem hraðbanki Arion banka verður fyrir skemmdum en aðfaranótt miðvikudagsins skemmdist hraðbanki bankans í verslunarkjarna við Bíldshöfða í Reykjavík mikið eftir að eldur kom þar upp.