Sterling kveður City: „Þvílíkt ferðalag“

Sterling hefur verið í herbúðum Manchester City síðan árið 2015 og unnið nánast allt sem hægt er að vinna með liðinu. Hann kveður nú félagið eftir sjö ára dvöl og verður hvað úr hverju kynntur sem nýr leikmaður Chelsea.

„Sjö tímabil, ellefu stórir titlar og minningar fyrir lífstíð,“ skrifaði Sterling í kveðju sinni til City.

„Til þjálfarateymisins sem hefur leikið stórt hlutverk í þróun minni á undanförnum árum. Til liðsfélaga minna sem hafa orðið annað og meira en bara menn sem deila sama velli og ég. Til starfs­fólks­ins, til skrif­stofu­fólks­ins, til stuðnings­fólks­ins sem hef­ur verið óþreyt­andi í stuðningi sín­um við liðiið, og til allra sem tengj­ast Manchester City. Virðing mín fyr­ir ykk­ur gæti ekki verið meiri.“

„Því­líkt ferðalag.

Ég er þakk­lát­ur fyr­ir góðu stund­irn­ar og þær slæmu, þar sem þær slæmu hafa stund­um reynt á styrk­leika minn og út­hald, og gert mér kleift að standa hér frammi fyr­ir ykk­ur sem besta mögu­lega út­gáf­an af sjálf­um mér.

Ég kom tví­tug­ur strák­ur til Manchester. Ég fer héðan sem maður.

Takk fyr­ir ykk­ar enda­lausa stuðning. Það hef­ur verið heiður að klæðast bún­ingi Manchester City.“

Eins og áður segir gekk Sterling í raðir Manchester City árið 2015 frá Liverpool þar sem hann hóf sinn atvinnumannaferil. Sterling varð þá dýrasti enski knattspyrnumaðurinn frá upphafi.

Á þessum sjö árum hefur Sterling leikið 225 deildarleiki með City og skorað í þeim 91 mark. Með liðinu hefur hann unnið ensku úrvalsdeildina fjórum sinnum, FA-bikarinn einu sinni og deildarbikarinn fjórum sinnum.