Stuðningsmaður AC Milan hótar að aflima sig ef þeir selja framherja

Umræddur stuðningsmaður skrifaði á Twitter að ef Leao myndi ekki framlengja samning sinn við liðið þá myndi hann skera af sér fótlegginn. Stuðningsmaðurinn sem gengur undir nafninu Gabriele er með andlitsmynd af Leao húðflúraða á löppinni.

Leao sjálfur svaraði færslunni, með grátandi lyndistáknum. Leikmaðurinn er með nýtt samningstilboð frá AC Milan sem bíður eftir hans undirskrift.

PSG og Chelsea eru á meðal þeirra liða sem hafa áhuga á þessum 23 ára gamla framherja en Milan hefur sagt að félagið muni ekki samþykkja tilboð undir 127 milljónum punda.