Ten Hag gefur engan af­slátt af leik­stílnum: „Hvað í and­skotanum ertu að gera?“

Hollenski knattspyrnustjórinn er með skýra hugmyndafræði en hann aðhyllist leikstíl þar sem spilað er út frá markverði og mest megnis með stuttum sendingum milli línanna hjá andstæðingnum. Sé löngum sendingum beitt sé það gert með skýrum tilgangi. 

Erik ten Hag var á einum tímapunkti afar ósáttur við að David de Gea, markvörður Manchester United, spyrnti löngum bolta frá marki sínu. 

Ekki er ljóst hvort reiði knattspyrnustjórans var beint að spænska landsliðsmarkverðinum eða Charlie Savage sem kom ekki nógu djúpt á völlinn til þess að bjóða sig og fá boltann. 

„Hvað í andskotanum ertu að gera," öskraði Erik ten Hag þegar boltinn flaug langt fram völlinn. 

Anthony Martial, Marcus Rashford og Jadon Sancho skoruðu mörk Manchester United í 3-1 sigri liðsins en liðið hafði áður borið sigur úr býtum gegn Liverpool og Melbourne Victory í æfingaleikjum liðsins á undirbúningstímabilinu.