Stal snyrti­vörum að verð­mæti tæpra tvö hundruð þúsund króna

Maðurinn er ákærður í alls fimm liðum, þrír þeirra tengjast þjófnaði og tveir tengjast umferðarlagabrotum. Maðurinn var tvisvar stöðvaður við akstur er hann var sviptur ökuréttindum.

Þann 1. október árið 2019 stal maðurinn einni flösku af Jack Daniel‘s old nr. 7 í verslun ÁTVR í Kópavogi. Þann 27. sama mánaðar stal hann síðan mjúkdýri og barnakolli í IKEA.

Þann 13. júlí á síðasta ári stal hann, ásamt öðrum manni, snyrtivörum að verðmæti 177 þúsund króna í verslun Hagkaups í Kringlunni.

Þess er krafist að maðurinn verði dæmdur til refsingar, til greiðslu alls sakarkostnaðar og til að sæta sviptingu ökuréttinda.

Ekki hefur tekist að birta manninum ákæruna og hún því birt í Lögbirtingablaðinu í dag. Málið verður tekið fyrir við Héraðsdóm Reykjavíkur þann 14. september næstkomandi.