Svíar þurfa skothelt plan

Linda Sembrandt skoraði dramatískt sigurmark fyrir Svía á 92. mínútu leiksins í gærkvöld til að tryggja sæti Svía í undanúrslitunum sem fara fram á Bramall Lane í Sheffield á þriðjudaginn kemur. Peter Gerhardsson, þjálfari Svía, sat fyrir svörum á blaðamannafundi eftir leik gærkvöldsins.

„Þetta verður áhugaverður leikur. Ég held að það verði afar erfitt fyrir okkur að vinna þær,“ sagði hann um komandi verkefni gegn Englandi.

„Við þurfum að spyrja okkur hvað getum við gert til að koma í veg fyrir að þær spili vel og hver eru okkar tækifæri til að sigra þær? Við þurfum að ræða það og skoða leikina þeirra. Þær hafa mikla reynslu. En við munum þurfa plan. Ég get fullvissað ykkur um það að við munum vera með plan, og við þurfum algjörlega skothelt plan.“ sagði Gerhardsson.

Belgía komst naumlega í 8-liða úrslitin eftir sigur á Ítalíu í lokaleik riðils Íslands en bæði stelpurnar okkar og Ítalía sátu eftir með sárt ennið. Svíar voru með öll völd í leiknum í gær en eftir 33 marktilraunir kom markið ekki fyrr en í uppbótartíma.

Síðasti leikur 8-liða úrslitanna fer fram í kvöld þegar Frakkland og Holland eigast við. Sigurlið þess leiks mætir Frakklandi í hinni undanúrslitaviðureigninni.