Minna en helmingur enskra liða með alla sína búninga til sölu

Þegar skoðaðar eru fjórar efstu deildir enskrar knattspyrnu eru aðeins 44 af 92 liðum með allar útgáfur af búningum sínum til sölu á heimasíðum félaganna.

Framleiðendur búninganna hafa lent í ýmsum vandræðum í birgðakeðjunni og því eru ansi margir stuðningsmenn sem munu ekki geta keypt þá búninga sem þeir vilja áður en tímabilið hefst.

Enska B-deildin hefst næstkomandi föstudag, C-, og D-deildirnar á laugardaginn og enska úrvalsdeildin á föstudaginn í næstu viku, 5. ágúst.

Eins og áður segir eru aðeins 44 af 92 liðum sem eru með allar útgáfur af búningnum sínum til sölu. 22 lið geta aðeins boðið upp á aðalbúning liðsins og sjö geta aðeins boðið upp á varabúninginn. Þá eru 19 lið sem geta ekki boðið upp á neina útgáfu af nýjustu búningum liðsins.

Af þessum 19 liðum sem geta ekki boðið upp á neina útgáfu af nýjustu búningum liðsins eru tvö úrvalsdeildarfélög, en stuðningsfólk Crystal Palace og Leeds þarf að gera sér það að góðu að klæðast gömlum treyjum í bili.