Enski boltinn hófst formlega í dag þegar Liverpool og Manchester City áttust við í leiknum um Samfélagsskjöldinn. Leikið var á King Power leikvangnum í Leicester þar sem Wembley er upptekinn vegna Evrópumótsins í fótbolta.
Liverpool voru sterkari aðilinn í fyrri hálfleik og leiddu verðskuldað í leikhléi, 1-0. Markið gerði Trent Alexander-Arnold með skoti utan vítateigs eftir rúmlega tuttugu mínútna leik.
Argentínumaðurinn Julian Alvarez kom inn af varamannabekk Man City í síðari hálfleik og var fljótur að setja mark sitt á leikinn því hann jafnaði metin á 70.mínútu.
Á 83.mínútu náði Mohamed Salah aftur forystunni fyrir Liverpool með marki úr vítaspyrnu sem var dæmd eftir að Ruben Dias handlék boltann innan vítateigs.
Darwin Nunez kom inn af varamannabekk Liverpool í síðari hálfleik og hann gulltryggði sigur liðsins þegar hann skallaði boltann í netið í uppbótartíma og lokatölur 3-1 fyrir Liverpool.
Liverpool vann Samfélagsskjöldinn síðast árið 2006 en þetta er í sextánda sinn sem félagið vinnur skjöldinn.
