Hafa áhyggjur af horuðum mjaldri sem er fastur í Signu

Mjaldurinn hefur sést í ánni um áttatíu kílómetra frá París og er búinn að synda um 160 kílómetra leið. Samkvæmt Reuters er hann ansi veikburða og hægfara. 

Þá hefur hann ekki borðað þann mat sem björgunaraðilar hafa reynt að gefa honum. Dýralæknar meta nú næstu skref og hvort það sé hægt að bjarga mjaldrinum.

Mjaldrar lifa einna helst í Norður-Íshafi en einnig á kaldtempruðum svæðum. Þeir eiga það þó til að fara í ævintýri suður á bóginn. Mjaldrar eru hjarðdýr og ferðast oftast um það bil fimmtán hvalir saman. Mjaldrar geta orðið allt að þrjátíu ára gamlir.