Haaland blótaði tvisvar í sjón­varps­við­tali eftir leik

Haaland stimplaði sig inn í ensku úrvalsdeildina með því að skora bæði mörk Manchester City í 2-0 útisigri á West Ham.

Það fyrra skoraði hann úr vítaspyrnu sem hann fékk sjálfur og það seinna með frábærri framherjaafgreiðslu eftir súpersendingu frá Kevin De Bruyne.

Aðeins einn annar leikmaður hefur byrjað feril sinn með City í ensku úrvalsdeildinni með tveimur mörkum í fyrsta leik og það er markahæsti leikmaðurinn í sögu félagsins, Sergio Aguero.

Haaland hélt líka í þá hefð sína að skora alltaf í fyrsta leik sínum með liði.

Pep Guardiola, knattspyrnustjóri Manchester City, var auðvitað mjög ánægður með Norðmanninn og sagði hann fæddan til að skora mörk.

Hann þarf kannski að fara aðeins betur yfir frammistöðu hans í viðtölum en Haaland blótaði tvisvar í sjónvarpsviðtali eftir leik eins og sjá má hér fyrir neðan.