Fá annan Dana til að fylla Eriksen-skarðið

Damsgaard er væntanlega ætlað að fylla skarðið sem landi hans, Christian Eriksen, skildi eftir sig hjá Brentford. Eriksen spilaði með liðinu seinni hluta síðasta tímabils og átti stóran þátt í að það hélt sér þægilega í ensku úrvalsdeildinni. Eriksen samdi svo við Manchester United í sumar.

Segja má að hlutverkin hafi snúist við frá EM í fyrra þar sem Damsgaard kom inn í danska liðið eftir að Eriksen fór í hjartastopp í fyrsta leik mótsins. Damsgaard skoraði eitt mark á EM, með skoti beint úr aukaspyrnu í leiknum gegn Englandi í undanúrslitunum.

Talið er að Brentford hafi borgað tæpar þrettán milljónir punda fyrir hinn 22 ára Damsgaard. Hann skrifaði undir fimm ára samning við félagið. Damsgaard er fimmti leikmaðurinn sem Brentford fær í sumar. Áður voru Ben Mee, Aaron Hickey, Keane Lewis-Potter og Thomas Strakosha komnir til félagsins.

Damsgaard er sjötti Daninn í leikmannahópi Brentford. Þá er knattspyrnustjóri liðsins, Thomas Frank, danskur.

Brentford gerði 2-2 jafntefli við Leicester City í 1. umferð ensku úrvalsdeildarinnar. Um næstu helgi mætir liðið Eriksen og félögum í United.