Jóhann Berg og félagar unnu annan leikinn í röð

Jóhann Berg hefur verið að koma hægt og rólega til baka eftir löng meiðsli og var þetta annar leikurinn í röð sem hann er í byrjunarliðinu. Hann lék um 65 mínútur í 5-1 sigri liðsins gegn Wigan í seinustu umferð og rétt tæpa klukkustund í kvöld.

Það voru hins vegar þeir Vitinho og Jay Rodriguez sem sáu um markaskorun Burnley í kvöld, en Vitinho kom liðinu yfir á 62. mínútu áður en Rodriguez tryggði sigurinn með marki tíu mínútum síðar.

Burnley situr nú í þriðja sæti ensku B-deildarinnar með 12 stig eftir sjö leiki, fimm stigum meira en Millwall sem situr í 19. sæti.