Eng­land og Þýska­land búin að tryggja sér sæti á HM næsta sumar

Evrópumeistararnir mættu Austurríki í dag en liðin voru einnig saman í riðli á EM í sumar. Þá vann England 1-0 sigur en nú vann England 2-0 sigur þökk sé leikmönnum Manchester United. Alessia Russo skoraði fyrra markið og Nikita Parris tryggði sigurinn með öðru marki liðsins þegar tuttugu mínútur voru til leiksloka. 

Lokatölur 2-0 og England endanlega búið að tryggja sér þátttökurétt á HM. Liðið hefur unnið alla níu leiki sína í undankeppninni, skorað 70 mörk og ekki fengið neitt á sig.

Þýskaland - liðið sem England vann í úrslitaleik EM - tryggði sér einnig þátttökurétt á HM með sigri í Tyrklandi. Eftir markalausan fyrri hálfleik skoraði Þýskaland þrjú mörk og tryggði þar með fyrsta sæti H-riðils. 

Ísland getur fylgt í fótspor Englands og Þýskalands með sigri eða jafntefli er liðið mætir Hollandi á þriðjudaginn kemur.