Gagnrýnir örvæntingarfullan Arteta fyrir þreföldu skiptinguna

United vann leikinn, 3-1, og varð þar með fyrsta liðið í ensku úrvalsdeildinni á tímabilinu til að taka stig af Arsenal.

Antony kom United yfir í fyrri hálfleik í sínum fyrsta leik fyrir félagið en Bukayo Saka jafnaði fyrir Arsenal í upphafi seinni hálfleiks. Marcus Rashford kom heimamönnum aftur yfir á 66. mínútu og átta mínútum síðar gerði Arteta þrefalda skiptingu þar sem hann setti Emile Smith-Rowe, Fábio Viera og Eddie Nketiah inn á fyrir Martin Ødegaard, Oleksandr Zinchenko og Albert Sambi Lokonga.

Skiptingin heppnaðist ekki sem skildi því Rashford jók forskot United í 3-1 skömmu seinna. Það urðu lokatölur leiksins. Neville segir að Arteta hafi hlaupið á sig í stöðunni 2-1.

„Í þeirri stöðu var engin ástæða til að verða svona örvæntingarfullur. Þegar tuttugu mínútur voru eftir hugsaði ég að þetta gæti endað 4-1 eða 5-1. United var þéttara fyrir og setti Fred og Casemiro inn á. Og þeir sóttu bara hratt eftir það. Ég held að Arsenal hafi ekki þurft að vera svona örvæntingarfullt,“ sagði Neville.

„Annað markið sló Arsenal út af laginu því það kom gegn gangi leiksins. Arsenal svaraði því ekki vel og verðskuldaði því að tapa leiknum. En ef þeir hefðu haldið áfram að spila eins og þeir gerðu hefðu þeir komist aftur inn í leikinn. Um leið og skipulagið fór út um gluggann eftir skiptingarnar var United alltaf að fara að skora þriðja markið eftir skyndisókn.“

Þrátt fyrir tapið er Arsenal enn á toppi ensku úrvalsdeildarinnar með fimmtán stig eftir sex umferðir. United er með tólf stig í 5. sætinu.