Willum Þór og Hákon Arnar á skotskónum

Ernirnir sóttu Twente heim og stefndi allt í tap eftir að Ricky van Wolfswinkel kom heimamönnum yfir með marki úr vítaspyrnu í fyrri hálfleik. Það var ekki fyrr en venjulegur leiktími var liðinn sem gestirnir fengu einnig vítaspyrnu.

Willum Þór fór á punktinn og jafnaði metin í 1-1, reyndust það lokatölur leiksins. Ernirnir sitja nú í 11. sæti deildarinnar með 14 stig að loknum 13 leikjum. Ákveðið afrek miðað við að liðið tapaði fyrstu fimm leikjum tímabilsins. Nú hafa Ernirnir hins vegar leikið átta leiki án taps.

Í Danmörku var sannkallaður Íslendingaslagur þegar Freyr Alexandersson mætti með sína pilta í Lyngby á Parken, heimavöll FC Kaupmannahafnar. Sævar Atli Magnússon var í byrjunarliði gestanna en Alfreð Finnboga er frá vegna meiðsla og verður það út þetta ár. 

Bæði Hákon Arnar Haraldsson og Ísak Bergmann Jóhannesson voru á varamannabekk FCK. Eina mark fyrri hálfleiksins skoraði hinn 16 ára gamli Roony Bardghji eftir undirbúning Mohamed Daramy. Í síðari hálfleik tvöfaldaði 

Hákon Arnar kom inn af bekknum þegar klukkutími var liðinn og tvöfaldaði forystuna tíu mínútum síðar. Skömmu síðar bætti Viktor Claesson við þriðja markinu en hann var svo tekinn af velli fyrir Ísak Bergmann Jóhannesson. Mörkin urðu þó ekki fleiri og lokatölur 3-0 FCK í vil. 

Meistararnir hafa verið að rétta úr kútnum og eru komnir upp í 3. sæti með 24 stig eftir 16 leiki. Lyngby er á sama tíma á botni deildarinnar með aðeins fimm stig.