Aron Sig skoraði | FC Kaup­manna­höfn á fleygi­ferð

Nýliðar Horsens byrjuðu ekki vel á heimavelli í dag en gestirnir í OB voru komnir 2-0 yfir eftir aðeins nítján mínútna leik. Aron minnkaði muninn á 34. mínútu með sínu sjötta marki á leiktíðinni. Aðeins þremur mínútum síðar voru heimamenn búnir að jafna metin.

Bæði lið skoruðu eitt mark í síðari hálfleik og lauk leiknum með 3-3 jafntefli. Aron lék allan leikinn í liði Horsens og nældi sér í gult spjald þegar fimm mínútur voru komnar fram yfir venjulegan leiktíma. Aron Elís Þrándarson sat allan tímann á varamannabekk OB.

Í Árósum mættust AGF og meistarar FCK. Hákon Arnar var eini Íslendingurinn í byrjunarliði gestanna en bæði Ísak Bergmann Jóhannesson og Orri Steinn Óskarsson voru á varamannabekk FCK í dag.

Eftir markalausan fyrri hálfleik skoruðu heimamenn á tíundu mínútu síðari hálfleiks. Markið var hins vegar dæmt af vegna rangstöðu í aðdraganda marksins. Bæði Mikael og Hákon Arnar voru komnir af velli þegar Lukas Lerager kom FCK yfir á 79. mínútu.

Ísak Bergmann kom inn af bekknum í uppbótartíma og skömmu síðar tvöfaldaði vinstri bakvörðurinn Viktor Kristansen forystu gestanna. Lokatölur 0-2 og FCK unnið þrjá leiki í röð án þess að fá á sig mark. Raunar hafa meistararnir ekki tapað deildarleik síðan þeir töpuðu fyrir Midtjylland 18. september.

Staðan í deildinni er þannig að FCK er í 3. sæti með 27 stig. OB er í 5. sæti með 24 stig og Horsens í 9. sæti með 22 stig.