Karó­lína Lea loks að snúa til baka: „And­­lega hef ég aldrei verið betri“

Karólína Lea stóð vakti verðskuldaða athygli á Evrópumótinu í fótbolta sem fram fór í Englandi síðasta sumar. Hún skoraði glæsilegt mark í 1-1 jafntefli Íslands og Ítalíu ásamt því að vera einn af bestu leikmönnum liðsins í öllum þremur leikjum þess. Það kom því verulega á óvart þegar í ljós kom að hún hafði verið að spila í gegnum erfið meiðsli allan tímann.

Meiðsli sem voru það slæm að á endanum var ákveðið að hún yrði að taka sér pásu frá fótbolta til að jafna sig. Bayern birti hins vegar mynd af Karólínu Leu nýverið þar sem gefið var til kynna að hún væri byrjuð að æfa á nýjan leik. Vísir heyrði því í þessari ungu landsliðskonu og tók stöðuna.

„Þetta er sinin aftan í læri, er búið að vera síðan í ágúst á síðasta ári. Hef núna verið í endurhæfingu í fjóra mánuði en þó ég sé byrjuð að æfa með liðinu þá fer ég ekki beint inn í æfingahópinn. Ég þarf að æfa vel og koma mér inn í æfingarnar. Ef allt gengur vel þá vonandi næ ég síðasta leiknum fyrir áramót á móti Benfica í Meistaradeildinni. Ef allt fer vel,“ sagði Karólína Lea um meiðslin og hversu lengi þau hafa plagað hana.

Leikurinn gegn Benfica er þann 21. desember næstkomandi. Hún stefnir svo á að vera komin á fullt þegar Bayern hefur leik að nýju í febrúar á næsta ári. Þó þessi öflugi sóknarþenkjandi miðjumaður hafi ekki mátt æfa né spila undanfarna mánuði hefur hún verið með meiri viðveru á æfingasvæði Bayern en þegar hún er leikfær.

„Ég hef verið úti allan tímann. Þegar þú ert meidd þá æfir maður mun meira, var byrjuð að æfa tíu sinnum í viku síðustu fjórar vikurnar í endurhæfingunni. Fór í ræktina fyrri partinn og fótbolta seinni partinn. Það er verið að reyna gera mann eins tilbúna í liðsæfingar og hægt er. Að vera með liðinu á æfingum er eins og frí miðað við æfingarnar þegar maður er að glíma við meiðsli, svona miðað við.“

Ætlaði sér að spila á EM

„Ég hef aldrei verið einhver meiðslapési en svo allt í einu lendi ég í þessum ömurlegu meiðslum. Þetta er svo óþægilegt því þetta er ekki brotið bein, í rauninni var ég alltaf að þrauka í gegnum smá verk. Svo út af því ég er bara 21 árs þá meikar ekki sens að vera berjast í gegnum allar æfingar.“

„Undirmeðvitundin vissi alveg að þetta væri ekki sniðugt en mig langaði rosalega að spila á EM. Auðvitað hefði ég átt að hvíla mig um leið og fann fyrir þessum verk aftan í læri en ég hugsaði alltaf að þetta væri ekki svo vont svo ég hélt alltaf áfram.

Karólína Lea þakkar góðu baklandi sem og liðsfélögum sínum hjá Bayern en hún er ekki eini Íslendingurinn á mála hjá félaginu. Glódís Perla Viggósdóttir er lykilmaður í vörn liðsins og markvörðurinn ungi Cecilía Rán Rúnarsdóttir að reyna brjóta sér leið inn í byrjunarliðið.

„Það munar öllu. Ég er heppin, ég fæ mikið af heimsókn og mér líður mjög andlega hérna úti. Fæ minn stuðning og endurhæfingin hérna úti er eins flott og hægt er, það er gert allt fyrir þig. Andlega hef ég aldrei verið betri,“ sagði Karólína Lea að endingu.