Styrktu Ljónshjarta um 8,5 milljónir eftir bolasölu

Um er að ræða ágóða af árlegri bolasölu hópsins, en auk ágóðans af sölunni var Íslandsbanki bakhjarl verkefnisins. Styrkurinn mun renna beint í sjóð sem greiðir sálfræðiþjónustu fyrir börn sem missa foreldri en árlega missa um hundrað börn á Íslandi foreldri.

Átakið Konur eru konum bestar stóð fyrir árlegri bolasölu í september síðastliðnum líkt og undanfarin ár. Verk eftir Kristínu Dóru Ólafsdóttur prýddi bolina sem á stóð: „Enginn veit neitt og allir eru bara að gera sitt besta.“ 

Auk Kristínar Dóru voru það Elísabet Gunnarsdóttir, Aldís Pálsdóttir, Andrea Magnúsdóttir og Nanna Kristín Tryggvadóttir sem stóðu að söfnuninni. 

„Ég er ótrúlega stolt af þessu átaki, ég veit að þessi styrkur er kominn á góðan stað og það er út af öllu fólkinu sem tekur þátt í þessu með okkur árlega og kaupir boli sem þetta er hægt. Nú mega jólin koma fyrir mér,“ segir Nanna Kristín um verkefnið. 

Metsala var á bolunum þetta árið og kláraðist fyrsta upplag á örfáum dögum. Frá árinu 2017 hefur hópur kvenna undir merkjum Konur eru konum bestar selt boli fyrir góðan málstað og hafa nú safnast alls 26.400.000 kr frá því að hópurinn hóf góðgerðarstarf sitt.

Árið 2017 safnaði hópurinn einni milljón fyrir Kvennaathvarfið. Árið 2018 lögðu þær 1,9 milljónir í menntunarsjóð Mæðrastyrksnefndar og árið 2019 3,7 milljónir til Krafts. Árið 2020 styrktu þær Bjarkarhlíð um 6,8 milljónir og Stígamót um 4,5 milljónir á síðasta ári. Metið var svo slegið í ár eins og áður sagði og var styrkurinn 8,5 milljónir.