Hákon og Óðinn fara á HM en hvorki Stiven Tobar né Teitur

Óskar Ófeigur Jónsson skrifar 23. desember 2022 11:15

Kristján Örn Kristjánsson hefur spilað vel í Frakklandi og er í hópnum. Vísir/Hulda Margrét

Teitur Örn Einarsson og Stiven Tobar Valencia eru hvorugir í HM-hópi Guðmundar Guðmundssonar sem var tilkynntur í dag.

Guðmundur Guðmundsson, þjálfari íslenska karlalandsliðsins í handbolta, tilkynnti í dag lokahóp sinn fyrir heimsmeistaramótið í janúar en mótið fer að þessu sinni fram í Svíþjóð og Póllandi.

Guðmundur hafði áður valið 35 manna úrtakshóp fyrir mótið en landsliðsþjálfarinn tilkynnti í dag um það hvaða nítján leikmenn fara með á HM. Sextán leikmenn eru í hóp hverju sinni og það eru því alltaf þrír leikmenn fyrir utan hópinn í hverjum leik.

Guðmundur valdi þrjá markmenn þar sem Ágúst Elí Björgvinsson er til halds og trausts vegna meiðsla Viktors Gísla Hallgrímssonar. Viktor hefur verið í vandræðum með olnbogann sinn og Guðmundur vill passa upp á álagið á honum.

Guðmundur valdi ekki Valsmanninn Stiven Tobar Valencia í hópinn sinn heldur ákvað að taka frekar Hákon Daði Styrmisson sem er að spila í þýsku úrvalsdeildinni. Guðmundur ákvað líka að skilja Teit Örn Einarsson eftir heima en valdi frekar Óðinn Þór Ríkharðsson. Liðið er því með tvo hreinræktaða hægri hornamenn en ekki bara einn eins og á EM í janúar.

Teitur er að spila með þýska stórliðinu Flensburg en það dugar ekki til að komast í nítján manna hóp Íslands. Guðmundur ræddi við Teit sem er tilbúinn til vara ef þörf er á að kalla hann inn.

Guðmundur talaði líka um vinstri hornamanninn Orri Freyr Þorkelsson og vinstri skyttuna Daníel Þór Ingason á fundinum og að það hafi verið erfitt að skilja þá eftir. Báðir hafa þeir verið í kringum liðið á síðustu árum.

Það er mikil áhugi á og spenna fyrir þessu móti meðal íslenskra handboltaáhugamanna enda náði íslenska liðið sjötta sæti á EM í ár og margir lykilmenn eru að gera frábæra hluti með liðum sínum erlendis.

Væntingarnar til liðsins eru því mjög miklar í aðdraganda mótsins enda er Ísland með frábært lið og enn fremur lið á besta aldri.

Æfingar liðsins byrja milli jóla og nýárs fyrir þá leikmenn sem luku leik með sínum félögum fyrir jól en þeir átta, sem koma seinna inn, byrja ekki að með liðinu fyrr en eftir áramót.

Allt íslenska liðið kemur ´siðan saman til æfinga 2. janúar næstkomandi en flýgur síðan út til Þýskalands 6. janúar þar sem liðið mætir Þjóðverjum í tveimur æfingarleikjum. Liðið færir sig svo yfir til Svíþjóðar 10. janúar.

Fyrsti leikur Íslands er á móti Portúgal 12. janúar en íslensku strákarnir mæta svo Ungverjum 14. janúar og loks Suður-Kóreu 16. janúar.