Shaq handboltans og Shaq sjálfur ætla að stofna handboltadeild í Bandaríkjunum

Kóngómaðurinn Gauthier Mvumbi sló í gegn á HM 2021 og fékk viðurnefndið Shaq handboltans. Þetta barst til eyrna Shaqs sem sendi línumanninum tröllvaxna skilaboð.

Þeir félagar hafa greinilega verið í sambandi frá HM fyrir tveimur árum því danskir fjölmiðlar greina frá því að þeir vinni nú að því að koma handboltadeild á laggirnar í Bandaríkjunum. Þeir hittust nýverið í New York til að ræða málin.

Handbolti er ekki hátt skrifuð íþrótt í Bandaríkjunum. Þau eiga þó loks lið á HM í Svíþjóð og Póllandi sem hefst í dag. Bandaríkjamenn eru í G-riðli með Egyptum, Króötum og Marokkóum.

Fyrir HM fyrir tveimur árum þekktu eflaust fæstir Mvumbi enda spilaði hann í frönsku D-deildinni. En hann var óvæntasta stjarna mótsins og vakti athygli fyrir góða frammistöðu. Mvumbi nýtti færin sín sérstaklega vel og skoraði tuttugu mörk úr 23 skotum á mótinu.

Mvumbi var einn af vinsælustu leikmönnum HM í Egyptalandi, fór í fjölmörg viðtöl og fylgjendafjöldi hans á Instagram margfaldaðist.