Vera ráðin fram­kvæmda­stjóri Mynd­stefs

Vera starfaði áður hjá háskóla-, iðnaðar- og nýsköpunarráðuneyti og hefur starfað innan stjórnarráðs Íslands frá árinu 2009. Hún er menntaður lögfræðingur frá Háskólanum í Reykjavík og hefur víðtæka reynslu af sérfræðistörfum á sviði lögfræði, alþjóðasamskipta og stefnumótunar. Hún kemur til með að stýra skrifstofu Myndstefs og halda utan um daglegan rekstur samtakanna, ásamt því að sinna fjölmörgum öðrum verkefnum.

Vera segist hlakka til að takast á við hin fjölbreyttu og áhugaverðu verkefni sem Myndstef kemur að, enda mikil áhugamanneskja um íslenska myndlist og menningu.

„Myndstef vinnur afar mikilvægt starf í þágu félagsmanna sinna. Mikilvægt er að styðja við starfsemi myndhöfunda, enda geta myndverk, endurbirting myndverka og umsýsla með þau verið afar margbreytileg. Það gefur augaleið að sjónlistir gegna veigamiklu hlutverki í íslensku samfélagi og hagsmunasamtök á borð við Myndstef eru lykilþáttur í að standa vörð um hagsmuni félagsmanna sinna. Ég hlakka til að takast á við öll þau spennandi verkefni sem framundan eru hjá Myndstefi.“

Myndstef eru höfundaréttarsamtök sem standa vörð um höfundarétt höfunda og höfundarétthafa sjónlista, þar með talið myndlistarfólks, ljósmyndara, arkitekta og hvers kyns hönnuða. Innan Myndstefs eru fjölmörg aðildarfélög úr listageiranum, en aðildarfélög Myndstefs eru: Arkítektafélag Íslands, Fatahönnunarfélag Íslands, Félag húsgagna- og innanhúsarkitekta, Félag leikmynda- og búningahöfunda, Félag íslenskra gullsmiða, Félag íslenskra landslagsarkitekta, Félag íslenskra myndlistarmanna, Félag íslenskra samtímaljósmyndara, Félag íslenskra teiknara, Félag vöru- og iðnhönnuða, Grafía, Miðstöð hönnunar og arkitektúrs, Íslensk grafík, Leirlistafélagið, Ljósmyndarafélag Íslands, Myndhöggvarafélagið, Myndlistarfélagið, Samband íslenskra myndlistarmanna og Textílfélagið.