Segja ESB á móti stærst­a sam­run­a leikj­a­iðn­að­ar­ins

Fréttaveitan segir að framkvæmdastjórnin muni senda yfirlýsingu til Microsoft á komandi vikum. Þar verður farið yfir af hverju stofnunin er mótfallin kaupunum.

Í yfirlýsingu til Reuters segja talsmenn Microsoft að forsvarsmenn fyrirtækisins vinni náið með framkvæmdastjórninni að því að mæta áhyggjum eftirlitsaðila og yfirvalda. Markmið fyrirtækisins sé að veita fleira fólki aðgang að fleiri tölvuleikjum og kaupin muni hjálpa við það.

Microsoft tilkynnti að 69 milljarða dala kauptilboð í AB hefði verið samþykkt og að búið væri að skrifa undir samkomulag um sameiningu fyrirtækjanna.

Sjá einnig: Kaupin sem gætu kollvarpað leikjaheiminum

Sameining Microsoft og Activision Blizzard yrði sú stærsta í sögu leikjaiðnaðarins og með kaupunum myndi Microsoft koma höndum yfir vinsæla tölvuleiki eins og Call of Duty seríuna, Diablo, Overwatch og World of Warcraft.

Fjármálaeftirlit Bandaríkjanna (FTC) sagði að desember að staða Microsoft varðandi leikjatölvuna Xbox yrði of sterk og sömuleiðis varðandi sífellt stækkandi leikjaáskriftar fyrirtækisins sem kallast Xbox Game Pass.

FTC vísar meðal annars í það að Microsoft ætli að gera komandi leiki fyrirtækisins Zenimax, sem Microsoft keypti fyrir nokkrum árum, eingöngu fáanlega á Xbox eða PC tölvur. Þannig hafi forsvarsmenn fyrirtækisins þegar sýnt að þeir séu tilbúnir til að beita góðri stöðu sinni gegn samkeppnisaðilum.

Yfirvöld í Bretlandi hafa einnig lýst yfir áhyggjum vegna kaupanna.

Forsvarsmenn Microsoft gerðu nýverið samkomulag við Nintendo um að Call of Duty leikirnir, sem eru einhverjir vinsælustu leikir heims, verði gerðir aðgengilegir á leikjatölvum Nintendo næstu tíu árin. Leikirnir eiga einnig að vera aðgengilegir á Steam í framtíðinni, sem er leikjaveita í samkeppni við Microsoft.

Áðurnefndir forsvarsmenn Microsoft segja tilbúnir til að gera sambærilegt samkomulag við Sony, um að halda COD-leikjum á PlayStation leikjatölvunum.