KSÍ styður Norrænu EM-umsóknina

Norræna framboðið berst við Pólland, Frakkland og Sviss um að halda Evrópumótið 2025. Það nýtur stuðnings Íslands sem er þó ekki með í umsókninni enda býður Laugardalsvöllur ekki upp á að halda leiki í lokakeppni.

Danir ætluðu upphaflega að sækja um að halda EM einir en fengu síðan hinar þrjár Norðurlandaþjóðirnar með sér í lið.

Allar Norðurlandaþjóðirnar sem eru með í sameiginlegu umsókninni hafa áður haldið EM. Noregur hélt EM 1987 og 1997, Danmörk 1991, Finnland 2009 og Svíþjóð 2013.

Ísland hefur verið með á undanförnum fjórum Evrópumótum, síðast í Englandi í fyrra. Þar gerði íslenska liðið jafntefli í öllum þremur leikjum sínum og komst ekki upp úr riðlakeppninni.