Borgar­stjóri Tor­onto segir af sér vegna fram­hjá­halds

Tory sagði af sér í kjölfar umfjöllunar blaðsins the Toronto Star. Hann greinir ekki frá því hver samstarfskonan sé, en segir framhjáhaldið hafa átt sér stað í kórónuveirufaraldrinum. Þau hafi tekið ákvörðun um að hætta að hittast fyrr á þessu ári.

Hinn 68 ára gamli borgarstjóri harmar atvikið og segist sjá eftir því.

„Ég biðst innilegrar afsökunar og ég bið fólkið í Toronto um að fyrirgefa mér. Ég bið Barb, eiginkonu mína, og fjölskyldumeðlimi einlæglega afsökunar,“ segir hjá Breska ríkisútvarpinu. 

Tory komst til valda árið 2014 og var aftur kosinn árið 2018. Nú sat hann sem borgarstjóri á sínu þriðja kjörtímabili.