Gísli Þorgeir mataði félaga sína í góðum sigri Magdeburg

Fyrir leikinn í dag var Magdeburg í öðru sæti síns riðils en tvö efstu liðin fara beint í átta liða úrslit keppninnar og þurfa ekki að keppa í umspili. Zagreb var hins vegar í sjötta sæti riðilsins.

Leikurinn var í járnum í fyrri hálfleik og skiptust liðin á forystunni. Magdeburg leiddi 16-14 í hálfleik en það var mesti munurinn á liðunum í hálfleiknum.

Í síðari hálfleik stigu Þýskalandsmeistararnir hins vegar aðeins á bensíngjöfina. Þeir komust fljótlega fjórum mörkum yfir og þann mun náðu Króatarnir ekki að brúa.

Forysta Magdeburg varð mest sex mörk líkt og munurinn var á liðunum í lokin, lokatölur 31-25 Magdeburg í vil sem þar með heldur öðru sæti riðilsins á eftir toppliði PSG.

Gísli Þorgeir skoraði þrjú mörk úr sex skotum fyrir Magdeburg í kvöld auk þess að gefa hvorki fleiri né færri en tíu stoðsendingar. Ómar Ingi Magnússon var ekki með Magdeburg vegna meiðsla sem munu halda honum frá keppni út tímabilið.