Fylgist með þessum í Bestu deildinni í sumar

Stefán Ingi Sigurðarson, Breiðablik

Lék sem lánsmaður með HK á síðasta tímabili og skoraði þá sextán mörk í fimmtán leikjum í deild og bikar. Sneri aftur til Breiðabliks í vetur, hefur leikið vel með Íslandsmeisturunum og virðist vera búinn að stimpla sig inn í byrjunarlið þeirra. Stefán er hávaxinn og hraustur, sterkur í loftinu, með góðan vinstri fót og óhemju duglegur.

Ólafur Kristófer Helgason, Fylkir

Fékk smjörþefinn af efstu deild þegar Fylkir féll 2021. Var svo aðalmarkvörður liðsins þegar það vann Lengjudeildina á síðasta tímabili. Ólafur fékk þá aðeins 23 mörk á sig í 22 leikjum. Fylkismenn treysta áfram á Ólaf og hann verður yngsti aðalmarkvörður liðs í Bestu deildinni í sumar. Afar spennandi verður að sjá hvernig hann spjarar sig.

Lúkas Logi Heimisson, Valur

Einn fjögurra ungra leikmanna sem Valur fékk fyrir tímabilið. Kom á endanum frá Fjölni eftir að hafa farið í verkfall til að knýja félagaskiptin í gegn. Lúkas spilaði sex leiki með Fjölni í efstu deild 2020 og hefur undanfarin tvö ár spilað 31 leik í Lengjudeildinni og skorað níu mörk. Hefur fengið mikið að spila með Val á undirbúningstímabilinu og verður væntanlega í stóru hlutverki í sóknarleik liðsins í sumar.

Jóhannes Kristinn Bjarnason, KR

Er af einni af mestu íslensku fótboltaaðalsættinni. Sonur Bjarna Guðjónssonar, barnabarn Guðjóns Þórðarsonar, frændi Ísaks Bergmanns Jóhannessonar og þar fram eftir götunum. Jóhannes lék einn leik með KR í efstu deild 2020 en fór svo til Norrköping í Svíþjóð eins og svo margir Íslendingar. Hann lék einn leik fyrir aðallið Norrköping en sneri heim í vetur og skrifaði undir þriggja ára samning við KR. Þessi átján ára miðjumaður ætti að fá helling að spila fyrir KR-inga í sumar.

Marciano Aziz, HK

Aziz tók Lengjudeildina í nefið á síðasta tímabili og skoraði þá tíu mörk í jafn mörgum leikjum fyrir Aftureldingu. Frammistaða hans vakti athygli félaga ofar í fótboltafæðukeðjunni en HK tryggði sér þjónustu Belgans. Þessi gríðarlega leikni og skemmtilegi miðjumaður hefur ekki farið af stað með neinum látum í hvítu og rauðu treyjunni en HK treystir á að hann sýni sínar bestu hliðar þegar út í alvöruna í sumar verður komið. 

Benedikt Daríus Garðarsson, Fylkir

Hefur spilað og skorað í öllum deildum á Íslandi nema þeirri efstu. Skoraði grimmt fyrir Elliða í 3. deildinni 2021 og hélt svo uppteknum hætti með Fylki í Lengjudeildinni í fyrra. Benedikt skoraði þá fjórtán mörk í 22 leikjum. Hann gerði fimm mörk í jafn mörgum leikjum fyrir Fylki í Lengjubikarnum og er, eftir að Mathias Laursen heltist úr lestinni, mikilvægasti sóknarmaður Fylkis og mikið mun mæða á honum í sumar.

Filip Valencic, ÍBV

Öfugt við aðra leikmenn á þessum lista er Valencic ekki ungur og efnilegur. Þvert á móti. Þetta er fullorðinn karlmaður á fertugsaldri með nokkuð tilkomumikla ferilskrá. Bestu árin sín átti Valencic í Finnlandi. Hann varð þrisvar sinnum meistari þar í landi, tvisvar sinnum valinn besti leikmaður finnsku úrvalsdeildarinnar og var einu sinni markakóngur hennar. Valencic hefur spilað vel með ÍBV á undirbúningstímabilinu og lofar mjög góðu.

Kjartan Kári Halldórsson, FH

Var frábær með Gróttu í Lengjudeildinni í fyrra. Skoraði sautján mörk og var markakóngur deildarinnar. Kjartan var seldur til Haugesund í Noregi eftir tímabilið. Hann var síðan lánaður til FH út tímabilið. Steig sín fyrstu skref í efstu deild með Gróttu 2020 en fær núna heilt tímabili í Bestu deildinni. Verður að öllum líkindum í byrjunarliði FH og þarf að skila sínu fyrir Fimleikafélagið.

Hlynur Freyr Karlsson, Valur

Einn af Ítalíuförunum. Gekk í raðir Bologna frá Breiðabliki haustið 2020. Leiðin lá heim í vetur og Hlynur samdi við Val. Hlynur er kraftmikill og fjölhæfur leikmaður sem getur spilað sem bakvörður, miðvörður og miðjumaður. Er fyrirliði U-19 ára landsliðsins sem tryggði sér sæti á EM fyrr í vikunni.

Pætur Petersen, KA

Færeyskur landsliðsmaður sem kom til KA frá HB í vetur. Hefur skorað grimmt í færeysku úrvalsdeildinni undanfarin ár og varð einu sinni færeyskur meistari og tvisvar sinnum bikarmeistari með HB. Þá spilaði hann með liðinu í Evrópukeppni. Pætur er einn af þeim sem fær það óöfundsverða hlutverk hjá KA að fylla í skarð besta og markahæsta leikmanns Bestu deildarinnar á síðasta tímabili, Nökkva Þeys Þórissonar. Byrjunin lofar allavega góðu því Pætur hefur spilað vel með KA í vetur.