Sex marka jafntefli í Brighton og Palace vann í endurkomu Hodgson

Brentford  náði forystunni í þrígang gegn Brighton í dag, en í öll skiptin náðu heimamenn að jafna metin. Pontus Jansson, Ivan Toney og Ethan Pinnock sáu um markaskorun gestanna, en Danny Welbeck, Kaoru Mitoma og Alexis MacAllister jöfnuðu metin fyrir Brighton. Sá síðastnefndi bjargaði stigi fyrir heimamenn með marku úr vítaspyrnu á seinustu mínútu venjulegs leiktíma.

Þá reyndist varamaðurinn Jean-Philippe Mateta hetja Crystal Palace þegar hann tryggði liðinu 2-1 sigur gegn Leicester með marki í uppbótartíma eftir að hafa komið inn á sem varamaður á 86. mínútu. Ricardo Pereira hafði komið Leicester yfir snemma í síðari hálfleik, en heimamenn jöfnuðu metin þegar Daniel Iversen varð fyrir því óláni að setja boltann í eigið net.

Að lokum vann Bournemouth góðan 2-1 sigur gegn Fulham og Nottingham Forest og Wolves gerðu 1-1 jafntefli.