„Galin ákvörðun“ að skjóta en Anton virðist veikur fyrir miðju marki

Valur Páll Eiríksson skrifar 11. apríl 2023 16:01

Þeir Lárus Orri og Albert Brynjar voru léttir í stúkunni í gær. Vísir/Stöð 2 Sport

Sigurmark HK gegn Breiðabliki í 4-3 sigri þeirra í Kópavogsslagnum í Bestu deild karla var til umræðu í Stúkunni sem gerði alla fyrstu umferðina upp í gærkvöld. Sammælst var um að ákvörðun Atla Þórs Jónassonar að skjóta að marki hafi verið vafasöm, en hann hafi haft heppnina með sér vegna markvörslutilburða Antons Ara Einarssonar.

HK skoraði sigurmark sitt gegn Breiðabliki á 93. mínútu leiksins þar sem Eyþór Aron Wöhler var gripinn í landhelgi af hinum 18 ára gamla Tuma Þorvarðssyni, sem átti frábæra tæklingu. Boltinn féll til Atla Þórs Jónassonar sem tók á rás, HK-ingar voru fjórir gegn þremur, en í stað þess að nýta yfirtöluna negldi Atli boltann á markið.

„Ég get alveg viðurkennt það, kæru áhorfendur, að þegar Atli byrjaði að munda skotfótinn 4 á 3, hugsaði ég nei, nei, nei, nei. En þá bara lét hann vaða,“ segir þáttastjórnandinn Guðmundur Benediktsson.

„Erum við búnir að finna veikleika hjá Antoni Ara? Er það bara að skjóta beint á markið?“ spyr Albert Brynjar Ingason í kjölfarið.

„Fyrsta markið er beint á hann. Þetta er líka beint á hann,“ svarar Guðmundur.

Klippa: Stúkan: Anton Ari og Atli Þór

„Bæði í fyrsta markinu og í þessu á hann að gera miklu betur,“ segir Lárus Orri Sigurðsson áður en þeir sneru sér aftur að skoti Atla.

„Þetta er náttúrulega gjörsamlega galin ákvörðun að skjóta þarna,“ segir Lárus. „Ekki fyrsta hann skoraði!“ svaraði Albert Brynjar.

„Þetta var eins röng ákvörðun og þær verða,“ segir Guðmundur. „En fyrst hann skoraði var þetta hárrétt ákvörðun,“ bætir hann við.

Umræðuna og atvikið má sjá í spilaranum að ofan.

Besta deildin er á Stöð 2 Sport. Smelltu hér til að horfa á leiki og þætti. Besta deildin er hluti af Stöð 2 Sport Ísland sem kostar 4.990 kr. á mánuði og má kaupa hér.

Besta deild karla Breiðablik HK Stúkan

Mest lesið

Fleiri fréttir