Dagur og Snorri voru til í að stýra landsliðinu saman

Á meðal kosta sem að nú virðast ekki lengur í boði er að félagarnir Dagur Sigurðsson og Snorri Steinn Guðjónsson stýri landsliðinu í sameiningu. Samkvæmt upplýsingum Vísis voru þeir báðir opnir fyrir þeim möguleika.

Dagur er núverandi þjálfari Japans en hefur áður meðal annars gert Þýskaland að Evrópumeistara og unnið brons á Ólympíuleikum, og Snorri hefur náð afar eftirtektarverðum árangri með Íslandsmeistara Vals á síðustu misserum. Báðir eru þeir fyrrverandi leikstjórnendur íslenska landsliðsins.

Dagur og Snorri voru í hópi þriggja þjálfara sem stjórn HSÍ byrjaði á að ræða óformlega við fyrir fimm vikum, með það í huga að ráða nýjan landsliðsþjálfara. Þær viðræður, sem ekkert framhald hefur orðið á, voru þó ekki á þeim forsendum að þeir myndu stýra liðinu saman og funduðu þeir í sitt hvoru lagi með forsvarsmönnum HSÍ.

Tíminn runninn út varðandi Apelgren og Dag

Þriðji kandídatinn sem HSÍ ræddi við á þessum tíma, rétt eftir leikina við Tékkland í byrjun mars, var Svíinn Michael Apelgren. Hann hafði mikinn áhuga á starfinu en ljóst var frá byrjun að Apelgren hefði aðeins tíma til 31. mars til að semja við HSÍ, þar sem klásúla í samningi hans við sænska félagið Sävehof leyfði það. Sá tími rann út og því kemur þessi 38 ára aðstoðarlandsliðsþjálfari Svíþjóðar ekki lengur til greina.

Í viðtali við Vísi í gær gagnrýndi Dagur formann og framkvæmdastjóra HSÍ harðlega fyrir slæleg vinnubrögð og samskiptaleysi, og lýsti því yfir að hann hefði ekki lengur áhuga á að starfa fyrir þá.

Eftir því sem Vísir kemst næst þá er enn möguleiki á að Snorri taki við landsliðinu en eftir því sem vikurnar líða er það þó ólíklegra. Snorri er samningsbundinn Val og spurning hve lengi núverandi vinnuveitendur hans eru tilbúnir að bíða áður en þeir myndu lenda í vandræðum með að finna hans arftaka og tímahraki við að mynda leikmannahóp þess þjálfara.

Berge verið nefndur til sögunnar

Það gustaði af Guðmundi Guðmundssyni eftir vonbrigðin sem landsliðið olli á heimsmeistaramótinu í janúar og ýmsir kölluðu eftir því að nýr landsliðsþjálfari yrði ráðinn í hans stað.

Vikurnar liðu og Guðmundur virtist halda starfinu eða þar til að 21. febrúar barst óvænt fréttatilkynning frá HSÍ um „samkomulag“ beggja aðila um að Guðmundur léti af störfum. Aðstoðarmenn hans, Gunnar Magnússon og Ágúst Jóhannsson, voru fengnir til að stýra liðinu tímabundið og virðist ætla að takast það ætlunarverk að enda með Ísland á toppi síns riðils í undankeppni EM en þeirri undankeppni lýkur með leikjum við Ísrael og Eistland í lok þessa mánaðar.

Þrátt fyrir að tveir mánuðir séu liðnir frá því að Guðmundur lét af störfum virðist hins vegar enn alls kostar óvíst hver varanlegur arftaki hans verður.

Óstaðfestur orðrómur er um að Guðmundur B. Ólafsson, formaður HSÍ, hafi mestan áhuga á að ráða Christian Berge, fyrrverandi landsliðsþjálfara Noregs. Berge tók hins vegar við spennandi verkefni sem þjálfari nýríka, norska félagsliðsins Kolstad í fyrra og óvíst hve raunhæfur sá kostur er.

Formaðurinn svaraði ekki

Kristján Andrésson hefur einnig verið orðaður við starfið en samkvæmt heimildum Vísis hefur hann ekkert heyrt frá HSÍ og virðist ekki koma til greina þar. Kristján hefur þó áhuga á starfinu, eins og reyndar flestir virðast hafa enda Ísland með sterkan leikmannahóp sem vonir standa til að geti jafnvel barist um verðlaun á stórmótum á komandi árum.

Formaður HSÍ, Guðmundur B. Ólafsson, svaraði ekki símtölum né skilaboðum frá Vísi í gær. Framkvæmdastjóri sambandsins, Róbert Geir Gíslason, vildi ekki tjá sig og vísaði á Guðmund.