Eftirlýstur Bam Margera flúði af vettvangi

Þetta kemur fram í tilkynningu lögreglunnar í Pennsylvaníu á Twitter. 

Þar segir að lögreglumenn hafi komið á vettvang eftir að þeim barst tilkynning um heimiliserjur í Chester-sýslu fyrr í dag. Að rannsókn lokinni kom í ljós að hinn 43 ára Bam Margera hafi lent í „líkamlegum átökum“ við aðra manneskju sem hafa valdið henni „smávægilegum áverkum“. 

Hins vegar flúði Margera af vettvangi inn í nálægan skóg áður en lögreglan kom á staðinn. Hann var ekki enn kominn í leitirnar þegar lögreglan birti handtökuskipun á hendur honum í dag. Yfirvöld óska eftir því að þeir sem hafi upplýsingar um málið hafi samband.

Hótaði að drepa bróður sinn

Samkvæmt upplýsingum miðilsins TMZ, sem segjast vera með lögregluskýrsluna, mun hið ónefnda fórnarlamb vera Jesse Margera, bróðir Bam. 

Í frétt TMZ um málið segir að Bam hafi barið á dyr bróður síns klukkan átta á sunnudagsmorgun og skilið eftir ógnvekjandi skilaboð á miða. Þar á að hafa staðið „Ef þú einu sinni fokking dirfist að siga lögreglunni á mig mun ég opinberlega fokka þér upp.“ 

Jesse segist síðan hafa farið niður á neðri hæð hússins og fundið Bam pissandi í eldhúsvaskinn. Í kjölfarið slógust þeir og segir Jesse að Bam hafi slegið sig ítrekað í höfuðið. Í lögregluskýrslunni kemur fram að það séu sjáanlegir áverkar á Jesse.

Eftir slagsmálin segir Jesse að Bam hafa sagt „Ég drep þig. Ég mun skjóta þig í hausinn.“ Þá á Bam einnig að hafa sagst ætla að drepa alla í húsinu, þar á meðal föður sinn og tvær aðrar konur. Síðan á Bam að hafa flúið af svæðinu inn í nærliggjandi skóg.

Eilíf vandræði á Bam

Atvikið í dag er aðeins nýjasta viðbótin í mun lengri sögu af hinum ýmsu vandræðum Margera. Fyrir nokkrum vikum var hann handtekinn í Kaliforníu fyrir ölvun á almannafæri þegar hann lenti í orðaskaki við konu á taílenskum veitingastað í Burbank.

Þar áður var hann handtekinn fyrir heimilisofbeldi á heimili sínu í Escondido í Kaliforníu þar sem hann átti að hafa sparkað í kærustu sína, Jessicu. Svona mætti lengi áfram telja.

Margir muna síðan eflaust eftir því þegar rappararnir Gísli Pálmi sló Bam Margera á Secret Solstice árið 2015. Að sögn staðarhaldara átti Margera að hafa áreitt konur á svæðinu og fékk að launum einn á kjaftinn frá rapparanum geðþekka. Margera var þá orðinn svokallaður Íslandsvinur eftir að hafa gift sig á landinu 2013.