Leita sem fyrr á öllum unglingum fyrir ball ársins

Nýlegar fregnir af hnífaburði í samfélaginu og aukinni neyslu varð til þess að móður í Reykjavík svelgdist á vatninu þegar hún fékk upplýsingapóst varðandi ballið fram undan.

Þar segir meðal annars:

„Af öryggisástæðum mun vera leitað á öllum unglingum sem sækja SamFestinginn. Leit fer fram áður en viðkomandi fer af stað í rútu á ballið og er framkvæmd af starfsfólki í félagsmiðstöð hjá viðkomandi ungling. Leitað er í töskum, úlpum, vösum og víðum klæðnaði. Ef viðkomandi neitar er strax haft samband við foreldra / forsjáraðila og unglingur sendur heim af viðburði á kostnað þeirra,“ segir í pósti til forráðamanna Frístundamiðstöðvar í Reykjavík.

Vernda krakka og tryggja öryggi

Andrea Marel er deildarstjóri unglingastarfs Tjarnarinnar, félagsmiðstöðvar í Reykjavík.

„Þetta er eitthvað sem við höfum alltaf gert. Við óskum eftir því að fá að kíkja í töskur og stóra vassa. Tryggja að ekkert óæskilegt fylgi þeim. Þetta er til að vernda krakkana og tryggja öryggi,“ segir Andrea Marel.

Hún segir vel skiljanlegt að fólk tengi þessar aðgerðir saman vegna fregna undanfarið og spurningar vakni. En það sé skýrt verklag að börn séu ekki með áfengi, tóbak eða vímuefni, ekki frekar en aðra óæskilega hluti svo sem vopn sem geti ógnað öryggi fólks.

„Það hefur aldrei verið neitt vesen með þetta.“

Allir saman í rútu

Samfestingurinn felur í sér heljarinnar ball á föstudagskvöldi og svo söngkeppni á laugardegi. Um er að ræða unglinga í 8. til 10. bekk sem koma víða að. Reglur ballsins fela meðal annars í sér að allir gestir koma saman á ballið í rútu með forsvarsmönnum félagsmiðstöðvarinnar og svo halda allir heim á leið að ballinu loknu.

„Þetta eru stífir verkferlar, fullt af starfsfólki og haldið vel utan um börnin.“

Mikil spenna er fyrir ballinu að sögn Andreu. Krakkarnir velja sjálfir listamenn á ballið, bóka þá og eru svo í ýmsum hlutverkum varðandi skipulagningu. Áhugasamir unglingar taka þátt í uppsetningu í Laugardalshöll og kynnast starfi rótarans.

Góðir skór lykilatriði

Krakkarnir völdu sjálfir Audda og Steinda til að skemmta, Páll Óskar mun syngja og DJ Dóra Júlía þeyta skífum. Þá munu unglingahljómsveitir hita upp fyrir stærri listamennina.

Það vakti athygli fyrir rúmum áratug að gestir á Samfésballinu mættu ekki klæðast stuttum pilsum, flegnum bolum eða fráhnepptum skyrtum. Andrea segir þá reglu hafa verið afnumda fyrir mörgum árum. Einu skilaboðin varðandi klæðnað sé góður skóbúnaður.

„Það ættu allir að vera í þægilegum skóm. Því þetta er langt, mikið fjör og mikill dans,“ segir Andrea og ljóst að háir hælar eru líklegir til að valda óþægindum í gleðinni fram undan.