Séðir ættu að „geta komið sjö, átta páska­eggjum í pokann“ á lager­sölu

Þetta segir Auðjón Guðmundsson, framkvæmdastjóri markaðs- og sölusviðs Nóa Síríus, um lagersölu á óseldum páskaeggjum sem fyrirtækið hefur ákveðið að blása til í húsnæði fyrirtækisins á Hesthálsi í Reykjavík á morgun.

Auðjón segir í samtali við Vísi að vanalega endurvinni fyrirtækið páskaeggin sem ekki seljast – nýti í aðrar vörur, gefi til góðgerðarstofnana eða selji til aðila í útlöndum.

„Nú hafa hins vegar borist sérstaklega margar óskir um að fá að kaupa páskaeggin á ódýrara verði, nú þegar páskarnir eru búnir. Við ákváðum að kanna málið og í kjölfarið að ráðast í þessa lagersölu. Það virðist rosalegur áhugi á þessu,“ segir Auðjón.

Bjóða poka á tvö þúsund krónur

Auðjón segir lagersöluna fara fram milli klukkan 16 og 18 á morgun. 

„Það verður bara þannig að fyrstir koma, fyrstir fá. Við munum bjóða fólki að kaupa poka við innganginn á tvö þúsund krónur og fólki verður þá frjálst að reyna að koma eins mörgum páskaeggjum fyrir í pokann og hægt er. Ef menn eru séðir þá ætti að vera hægt að ná einhverjum sjö eða átta stórum páskaeggjum ofan í pokann,“ segir Auðjón og vísar þar í að fólki sé frjálst að brjóta páskaeggin til að koma fleiri páskaeggjum fyrir.

Fleiri bretti

Auðjón segist ekki vera með nákvæma tölu hvað þetta eru mörg páskaegg sem verða þarna í boði. „Þetta er góður slatti. Fleiri, fleiri bretti.“

Hann segir að auk þess eigi eftir að taka frá einhvern hluta páskaeggjanna frá fyrir góðgerðarsamtök. Fyrirtækið muni þó bíða með mögulega sölu á páskaeggjum til aðila erlendis. Staðan varðandi hana verði tekin að lagersölunni lokinni.