Ten Hag: Þetta snýst ekki um Liverpool

Nú munar bara einu stigi á liðunum en United á þó enn leik inni á Liverpool.

Áhyggjuefnið er hins vegar að United hefur aðeins unnið einn af síðustu fjórum deildarleikjum en Liverpool hefur aftur á móti unnið sex deildarleiki í röð.

Erik ten Hag, knattspyrnustjóri Manchester United, var spurður út í mögulega pressu frá erkifjendunum úr Bítlaborginni vegna þess að Liverpool hefur étið upp forskot United á síðustu vikum.

„Þetta snýst ekki um Liverpool. Þetta snýst bara um okkur. Ef þú horfir á stöðuna í deildinni þá sérðu að við erum með allt í okkar höndum,“ sagði Erik ten Hag.

Manchester United á eftir heimaleik á móti Úlfunum, útileik á móti Bournemouth, heimaleik á móti Chelsea og heimaleik á móti Fulham. Þrír af fjórum síðustu leikjum liðsins fara því fram á Old Trafford sem ætti að boða mjög gott.

Liverpool á hins vegar eftir að spila þrjá leiki og þeir eru á móti Leicester á útivelli, á móti Aston Villa á heimavelli og á móti Southampton á útivelli.