Hundruð dauðra fugla í fjörunni á Fitjum í Njarð­vík

Víkur­fréttir greindu fyrst frá dauða fuglana. Ragnar Guð­leifs­son, mein­dýra­eyðir, náði í fugls­hræin í gær. Í sam­tali við Vísi segir hann að þeim hafi nú verið komið til Mat­væla­stofnunar. Segist hann telja nokkuð ljóst að hér sé um að ræða dauða sem rekja megi til af­brigði fugla­flensunnar.

„Þetta virðist koma í ein­hvers konar bylgjum. Núna virðist þessi flensa leggjast á ritin en í fyrra voru það súlurnar,“ segir Ragnar. Hann tekur hins vegar fram að dauðinn sé til rann­sóknar hjá Mat­væla­stofnun. Vísir hefur sent stofnuninni fyrir­spurn vegna málsins.

Fjölda­dauðinn ó­út­skýrður

Vísir greindi í síðustu viku frá því að Mat­væla­stofnun hefði miklar á­hyggjur af ó­út­skýrðum fjölda­dauða rita, auk þess sem stofnuninni hefði einnig borist margar til­kynningar um dauðar álftir, víðs­vegar um landið.

Sagði Brigitte Brug­ger, sér­greina­dýra­læknir hjá Mat­væla­stofnun, í sam­tali við Vísi að ekki hefði greinst fugla­flensa í þeim sýnum sem stofnunin hefði tekið úr dauðum fuglum hingað til, nema einu.

Sam­kvæmt Brigitte er þekkt að ritur geti drepist í stórum stíl ef þær komast í kinni við sýkt fersk­vatn. Fjölda­dauði rita nú sé hins vegar á stærra svæði en áður. Í einum fuglinum fannst venju­leg inflúensa en fugla­flensa hefur ekki enn þá fundist.

Þá segir hún að hinar tegundirnar, sem fóru illa út úr fugla­flensunni í fyrra, virðast vera að sleppa núna. „Við finnum ekkert. Það eru engir dauðir fuglar,“ segir Brigitte. Hugsan­legt sé að fugla­flensan sé að mestu gengin yfir í þessum tegundum en sé núna komin yfir í endur og jafn vel aðrar tegundir. „Fólk er að sjá súlur núna og þær eru bara sprækar,“ segir hún.