Haukur Helgi til Álftaness

Hann er annar landsliðsmaðurinn sem Álftanes fær en í síðustu viku samdi Hörður Axel Vilhjálmsson við nýliðana.

Haukur hefur verið einn fremsti körfuboltamaður þjóðarinnar um langt árabil. Hann hefur leikið 74 landsleiki og lék með landsliðinu á EM 2015 og 2017.

Undanfarin tvö tímabil hefur Haukur leikið með Njarðvík. Hann varð bikar- og deildarmeistari með liðinu 2021.

„Uppgangurinn á Álftanesinu hefur verið eftirtektarverður og verður gaman að skrifa söguna með því að taka þátt í fyrsta tímabili félagsins í efstu deild. Metnaðurinn í félaginu er mikill. Leikmannahópurinn er sterkur og ég er viss um að við getum látið góða hluti gerast. Ég er fullur tilhlökkunnar að mæta í Forsetahöllina,“ segir Haukur í fréttatilkynningu frá Álftanesi.

Haukur lék lengi sem atvinnumaður í Svíþjóð, Frakklandi, Rússlandi og á Spáni. Þá lék hann einn vetur með Maryland háskólanum í Bandaríkjunum.

Álftanes vann sér sæti í Subway deildinni á síðasta tímabili og leikur því í fyrsta sinn í efstu deild á næsta tímabili.