Fyrsta liðið síðan KA 2002 til að komast í oddaleik 2-0 undir

Það blés ekki byrlega fyrir Haukum eftir að hafa tapað fyrstu tveimur leikjunum gegn ÍBV í einvíginu um Íslandsmeistaratitilinn.

Haukar voru þó ekki af baki dottnir og minnkuðu muninn í 2-1 með sigri í Eyjum á föstudaginn, 28-34. 

Strákarnir hans Ásgeirs Arnar Hallgrímssonar fylgdu því svo eftir með því að vinna fjórða leik liðanna á Ásvöllum í fyrradag, 27-24.

Haukar eru því aðeins einum sigri frá Íslandsmeistaratitlinum eftir að hafa verið komnir með bakið þétt upp að veggnum fræga. Oddaleikur Hauka og ÍBV fer fram í Eyjum í kvöld.

Síðan úrslitakeppnin var tekin upp tímabilið 1991-92 hefur það aðeins tvisvar sinnum gerst að lið komi til baka eftir að hafa lent 2-0 undir í úrslitaeinvígi.

KA lenti 2-0 undir gegn Val í úrslitaeinvíginu 2002 en jafnaði metin og tryggði sér svo Íslandsmeistaratitilinn með sigri í oddaleik í Valsheimilinu.

Ekkert lið hafði síðan komið til baka úr 2-0 stöðu og knúið fram oddaleik þar til Haukar gerðu það í fyrradag. Þeir geta svo leikið sama leik og KA með sigri í Eyjum á morgun.

Haukar hafa þegar brotið blað í sögu úrslitakeppninnar en þeir eru fyrsta liðið sem endar í 8. sæti deildakeppninnar til að komast í úrslit um Íslandsmeistaratitilinn.

Haukar unnu aðeins níu leiki í Olís-deildinni en hafa þegar unnið sjö leiki í úrslitakeppninni. Þeir slógu Val út í átta liða úrslitum, 2-0, og Aftureldingu í undanúrslitunum, 3-2.

Leikur ÍBV og Hauka hefst klukkan 19:00 í kvöld og verður sýndur beint á Stöð 2 Sport. Upphitun Seinni bylgjunnar hefst klukkan 18:00.