Icebox haldið í fjórða sinn í kvöld: „Stærra en nokkru sinni fyrr“

„Ég setti saman mót núna þar sem fremsta hnefaleikafólk á Íslandi mun mætast hérna innbyrðis. Venjulega hafa erlendir klúbbar verið að koma að keppa hérna við okkur, en nú erum við bara með Ísland á móti Íslandi,“ sagði Davíð í samtali við Vísi í gær.

„Það stefnir í að þetta verði stærra en nokkru sinni fyrr.“

„Orðin algjör þvæla hvað þetta er orðið stórt“

Þegar blaðamaður Vísis náði tali af Davíð var hann einmitt staddur í Kaplakrika, sveittur við uppsetningu fyrir viðburðinn. Hann segir það í raun fáránlegt hvað þessi viðburður hafi stækkað frá því að hann var haldinn fyrst.

„Þetta er orðin algjör þvæla hvað þetta er orðið stórt núna. Það er orðið uppselt í dýrustu og næstdýrustu sætin, en það er eitthvað smá eftir af almennum miðum. En þetta er bara að verða pakkað.“

Margir áhugaverðir bardagar og „show-ið“ ekki af verri endanum

Alls verða tíu bardagar í Kaplakrika í kvöld og aðspurður að því hver þeirra væri sá sem fólk ætti helst að fylgjast með átti Davíð í miklum erfiðleikum með að gera upp á milli.

„Þetta eru tíu bardagar og þeir eru allir áhugaverðir. Það hljómar kannski skrýtið að ég sé að segja það, en þeir eru allir mjög áhugaverðir.“

„Ég held að það séu allir mjög spenntir að sjá aðalbardagann þar sem Elmar Gauti [Halldórsson] og Aleksandr Baranovs mætast. Þeir hafa mæst nokkrum sinnum og Elmar hefur alltaf unnið, en það hafa alltaf verið mjög svona „action-packed“ bardagar og bara frábær lokabardagi.“

„Svo er náttúrulega „Super-Heavyweight“ bardagi þar á undan. Það er +92kg flokkur. Þeir eru báðir einhver 110 kíló strákarnir þar. Bardaginn á undan því er líka mjög áhugaverður þar sem Alexander Irving er að taka stórt skref upp á við og berjast við Emin Kadri [Eminsson] sem er með fleiri bardaga en nokkur í íslenskri hnefaleikasögu. Hann ákveður að fara í hann í sínum sjötta bardaga held ég,“ sagði Davíð, en bardaga kvöldsins má sjá hér fyrir neðan.

Alvöru „show“

Það eru þó ekki bara hnefaleikar sem áhorfendur fá að sjá, heldur verður kvöldið einnig troðfullt af flottum tónlistaratriðum.

„Svo er þetta náttúrulega alvöru „show.“ Það eru sjö tónlistaratriði hérna og verið að labba inn með rappara með sér og einhver svoleiðis læti. Þannig að þetta verður alveg brjáluð stemning og miklu meira en bara eitthvað box.“

Davíð gefur þó ekki upp hvaða tónlistaratriði verði í Kaplakrika í kvöld, en fólk getur örugglega lesið á milli línanna í einhverjum tilvikum.

„Ég gef ekkert upp. En Lil Curly er DJ hérna og svo getur verið að það sjáist einhverjir prettibois hérna og einhverjar hnetur,“ sagði Davíð léttur. „Það verða alls konar alvöru nöfn hérna.“

„Eins og ég segi þá verða sjö atriði hérna þannig að það verður eitthvað fyrir alla. Mest verður þetta úr rappheiminum sem hefur fylgt boxinu aðeins. En þetta verða alvöru læti og ég hef sagt það hingað til og segi það aftur að þetta verður alltaf stærra og stærra og það er klárlega raunin núna. Við erum með stærra hljóðkerfi og stærra ljósakerfi en hefur verið og mikið fleiri íslenskir stuðningsaðilar því þetta eru náttúrulega bara Íslendingar að keppa. Það eru fleiri Íslendingar að fá tækifæri og mig hefur langað að gera það lengi,“ sagði Davíð að lokum.

Þá bætti Davíð einnig við að enn séu örfáir miðar lausir í almenn sæti, en aðrir miðar eru uppseldir.

Húsið opnar klukkan 17:00 og hefst fyrsti bardagi klukkustund síðar. Stöð 2 Sport verður svo með beina útsendingu frá klukkan 19:30 þar sem Dóri DNA og Kristín Sif Björgvinsdóttir munu sjá um að lýsa kvöldinu.