Hafnaði ráðleggingum og laug að ráðgjöfum um leyniskjölin

Frá því forsvarsmenn Þjóðskjalasafns Bandaríkjanna kröfðust þess fyrst að Trump skilaði þeim opinberu gögnum sem hann tók ólöglega með sér úr Hvíta húsinu, hefur hann ítrekað ekki viljað nýta sér tækifæri og tilboð til þess að reyna að leysa málið með því að skila gögnunum og forðast ákæru.

Trump flutti úr Hvíta húsinu þann 20. janúar en Þjóðskjalasafnið sendi Trump fyrst erindi um gögnin í febrúar það ár.  

Um haustið sagði Alex Cannon, þáverandi lögmaður Trumps, að hann ætti samkvæmt lögum að skila gögnunum. Seinna sagði Cannon að forsvarsmenn Þjóðskjalasafnsins myndu leita til þingsins eða Dómsmálaráðuneytisins ef hann skilaði gögnum ekki.

„Ég á þetta,“ sagði Trump þá, samkvæmt heimildarmönnum Washington Post. Forsetinn fyrrverandi ákvað þó að fara í gegnum einhverja af kössunum sem hann tók með sér og skilaði hann nokkrum þeirra.

Ekki ákærður vegna gagna sem hann skilaði

Í upphafi árs í fyrra skilaði hann fimmtán kössum en hélt minnst 64 eftir. Þá sagði hann ráðgjöfum sínum að gefa út yfirlýsingu um að öllum opinberum gögnum hefði verið skilað. Hann hélt þó eftir fleiri en hundrað leynilegum skjölum og öðrum opinberum gögnum.

Seinna meir, þegar honum var stefnt og skipað að skila þeim opinberum gögnum sem hann hafði haldið eftir, fékk hann aðstoðarmann sinn til að færa kassa og sagði hann lögmönnum sínum ekki frá því. Enn seinna gerðu rannsakendur Alríkislögreglu Bandaríkjanna húsleit í Mar-a-Lago og lögðu hald á gögnin.

Þetta kemur fram í viðtölum blaðamanna Washington við sjö af ráðgjöfum Trump. Þeir segja að Trump hafi sagt ósatt um hvað væri í kössunum sem eftir voru. Hann hefði haldið því fram að þeir innihéldu blaðaúrklippur og föt.

Þeir segja Trump hafa ítrekað neitað að fylgja ráðum lögmanna sinna og ráðgjafa og segja að þess í stað hafi hann hlustað á Tom Fitton, sem stýrir íhaldssömu samtökunum Judicial Watch, og aðra sem sögðu honum að halda gögnunum og taka slaginn við Dómsmálaráðuneytið.

Áðurnefndir ráðgjafar nefndu sérstaklega í samtölum við Washington Post að Trump var ekki ákærður vegna neinna gagna sem hann skilaði sjálfviljugur.

John F. Kelly, fyrrverandi skrifstofustjóri Hvíta hússins, sagði að Trump gæti ómögulega viðurkennt að hafa haft rangt fyrir sér eða gert rangt.

„Hann vildi eiga þetta og hann segir: „Þú getur ekki sagt mér hvað ég á að gera. Ég er snjallasti maðurinn í herberginu“,“ sagði Kelly samkvæmt frétt WP.

Viðurkenndi að gögnin væru leynileg

Trump var nýverið ákærður í 38 liðum en þar af snúa flestir að því að hann reyndi að komast hjá því að afhenda opinberu gögnin. Fimm liðir snúa að því að hann hafi reynt að fela leynileg skjöl og hindra framgang réttvísinnar. Tveir ákæruliðir snúa að því að Trump og aðstoðarmaður hans hafi logið að rannsakendum Alríkislögreglu Bandaríkjanna (FBI), sem er ólöglegt.

Áhugasamir geta séð ákæruna hér á vef Dómsmálaráðuneytisins.

Umrædd leynileg skjöl snerust meðal annars að varnarmálum Bandaríkjanna og annarra ríkja, kjarnorkuvopnum Bandaríkjanna og mögulegum veikleikum Bandaríkjanna og annarra ríkja, svo eitthvað sé nefnt.

Meðal sönnunargagna saksóknara er upptaka af Trump sýna tveimur mönnum leynilegt skjal. Á upptökunni heyrist hann segja að skjalið sé leynilegt og að hann ætti ekki að sýna þeim það. Þá viðurkennir hann einnig að hann hefði getað svipt skjalið leynd á meðan hann var forseti en það hefði hann ekki gert og nú væri það of seint.

Sjá einnig: Viðurkenndi á upptöku að gögnin væru leynileg

Í ákærunni gegn Trump kemur einnig fram að hann sagði Evan Corcoran, öðrum fyrrverandi lögmanni, að hann vildi alls ekki að einhverjir myndu skoða innihalda kassanna og lagði til að stefnu Þjóðskjalasafnsins yrði ekki svarað, eða svarað og sagt að engin opinber gögn væru í Mar-a-Lago. Hann lagði einni til að leynileg skjöl yrðu fjarlægð og falin.

Reiður eftir ákæru

Trump hefur brugðist reiður við ákærunni og beinir spjótum sínum að Joe Biden, núverandi forseta Bandaríkjanna. Meðal annars hefur Trump sakað Biden um pólitískar ofsóknir gegn sér og spillingu. Bandamenn Trump, stuðningsmenn og hægri sinnaðir fjölmiðlar eins og Fox News hafa tekið undir þá orðræðu.

Dómsmálaráðherra Bandaríkjanna skipaði sérstakan rannsakanda til að skoða gagnamál Trumps og ákærudómstóll fenginn til að leggja til hvort ákæra ætti í málinu.

Ákærudómstóll er fyrirbæri vestanhafs þar sem kviðdómendur eru fengnir til að fara yfir vitnisburð og gögn í ákveðnum málum og kanna hvort þeim þyki tilefni til að leggja fram ákærur vegna meintra brota.

Trump hefur heitið því að verði hann forseti aftur, muni hann skipa eigin rannsakanda til að ná „spilltasta forseta í sögu Bandaríkjanna, Joe Biden, og allri Biden glæpafjölskyldunni“.

Grafa undan lýðræðinu

Bandamenn Trump á þingi og víðar í Repúblikanaflokknum hafa tekið undir orðræðu hans um spillingu í dómsmálakerfinu, þó orðræðan sé innihaldslaus. Þeirra á meðal er Kevin McCarthy, forseti fulltrúadeildarinnar, sem hefur notað ákæruna gegn Trump í fjáröflun sinni, þar sem hann talar um nornaveiðar gegn forsetanum fyrrverandi.

Mitch McConnell, leiðtogi Repúblikana í öldungadeildinni, hefur hins vegar ekkert viljað segja um málið.

AP fréttaveitan segir marga þingmenn hafa komið Trump til varnar, jafnvel þó margir þeirra hafi viðurkennt að hafa ekki lesið ákæruna. Þetta sé fordæmalaust dæmi um það hvernig Trump hafi breytt Repúblikanaflokknum úr flokki sem prýddi sig af því að standa fyrir „lög og reglu“ en verji nú og réttlæti hinar alvarlegu ásakanir um að brjóta lög varðandi leynilegustu gögn Bandaríkjanna sem Trump stendur frammi fyrir.

Þá sé Trump á sama tíma að endurskrifa starfslýsinguna fyrir það að leiða annan af tveimur stærstu stjórnmálaflokkum Bandaríkjanna. Á meðan hann sé að bjóða sig aftur til embættis forseta Bandaríkjanna sé hann beinlínis að grafa undan lýðræðinu og hvetja kynslóð Repúblikana á þingi til að fylgja honum.