Ævintýri Isabellu halda áfram á erlendri grundu

Isabella Ósk samdi við efstu deildarliðið ZKK Zadar Plus sem er að fara að spila sitt fyrsta tímabil í deildinni frá upphafi.

Félagið var aðeins stofnað fyrir þremur árum og er komið alla leið upp í efstu deild.

Isabella er 25 ára kraftframherji sem hefur verið í landsliðinu undanfarin ár og á að baki tólf landsleiki.

Isabella Ósk hafði áður reynt fyrir sér í áströlsku deildinni með liði South Adelaide Panthers en kom aftur heim á síðustu leiktíð.

Hún samdi fyrst við uppeldisfélag sitt í Breiðabliki en skipti síðan yfir í Njarðvík í lok október.

Isabella Ósk var með 10,8 stig og 11,3 fráköst að meðaltali í deildarkeppninni en hún var frákasta- og framlagshæsti íslenski leikmaður deildarinnar með 19,8 framlagsstig í leik.

Í úrslitakeppninni hækkaði Isabella tölur sínar í 14,0 stig, 12,3 fráköst og 23,0 framlagsstig í leik.