Leita á náðir stjórnarþingmanna ef Katrín svarar ekki kallinu

„Frá því að þingið var sett óvanalega snemma í sumarfrí í ár þá hafa komið upp á yfirborðið upplýsingar sem varpa ljósi á nokkur stór mál sem hafa verið í deiglunni lengi, það er að segja Lindarhvolsmálið sem varðar sölu á fjölmörgum ríkiseignum, það varðar söluna á hlut ríkisins í Íslandsbanka og síðan aðdragandann að hvalveiðibanninu.“

„Allt eru þetta mál sem stjórnvöld koma á einn eða annan hátt að og þingið og það er bara gríðarlega mikilvægt að við komum saman núna en ekki einhvern tímann í lok september, byrjun nóvember til þess að ræða þessi mál og taka afstöðu til þeirra,“ segir Hanna Katrín Friðriksson, þingflokksformaður Viðreisnar, í samtali við fréttastofu.

Það sé mjög slæmt að stjórnvöld móist við og standi vörð um þau vinnubrögð sem upplýst hafi verið um í sumum þessara mála.

„Og líka að þau standi í veginum fyrir því að þau mál og önnur séu opinberuð, það er að segja að upplýsingarnar komi upp á yfirborðið og þingið taki afstöðu til þess hvernig við vinnum málin áfram.“

Vonar að þingmenn Sjálfstæðisflokks og Framsóknar vilji ræða hvalveiðimálið

Ef forsætisráðherra hafnar beiðni þingflokksformanna stjórnarandstöðuflokkanna þá þarf meirihluti þingmanna að samþykkja að þing komi saman.

Hann segir að þó pólitíska línan í Íslandsbankamálinu og Lindarhvolsmálinu virðist vera skýr milli stjórnarflokka og stjórnarandstöðu sé það ekki svo í hvalveiðimálinu þar sem þingmenn Sjálfstæðisflokks og Framsóknar hafa gagnrýnt þá ákvörðun Svandísar Svavarsdóttur matvælaráðherra að gera tímabundið hlé á hvalveiðum.

„Ef menn eru sjálfum sér samkvæmir þá ættu þingmenn Framsóknarflokks og Sjálfstæðisflokks að styðja þessa beiðni okkar og það er óskandi,“ segir Hanna Katrín.

Forsætisráðherra sagðist í gær ekki eiga von á því að hún muni kalla saman þing vegna birtingar á greinargerð um starfsemi Lindarhvols. Þingmenn Miðflokksins höfðu þá sent erindi til for­sætis­ráð­herra þar sem óskað var eftir því að hún myndi leggja fram til­lögu til for­seta Ís­lands þess efnis að þing yrði kvatt saman til að ræða þær upp­lýsingar sem fram kæmu í greinargerðinni.

„Ég á nú ekki von á því að ég kalli saman þing. Tel ekki að það sé vilji meirihlutans. En Miðflokknum verður að sjálfsögðu svarað síðar í dag,“ sagði Katrín að loknum ríkisstjórnarfundi í gær.

Ríkisstjórnin lítið spennt fyrir því að kalla þing saman

Stjórnarliðar hafa síðustu daga gefið lítið fyrir þær hugmyndir stjórnarandstöðunnar að þing verði kallað saman í sumar. Hanna Katrín telur að þetta sé í besta falli merki um einhvers konar sinnuleysi gagnvart hlutverki stjórnvalda.

„Það er auðvitað ekki þannig að það sé ekki mál stjórnvalda þegar verið er að selja ríkiseigur fyrir hundruð milljarða. Það skiptir máli að það takist vel til og það skiptir líka máli hvernig aðdragandinn og sjálft ferlið lítur út, það er að segja að það sé vandað til verka og bara bókstaflega að við vitum hvað við erum að gera og fyrir hverja við erum að vinna þessi mál.“

Alvarlegt að illa hafi gengið að fá upplýsingar

Þingflokkur Viðreisnar hefur ásamt öðrum stjórnarandstöðuflokkum lengi kallað eftir því að skipuð sé sérstök rannsóknarnefnd til að skoða söluna á hlutum ríkisins í Íslandsbanka. Á dögunum var svo birt greinargerð fyrrverandi setts ríkisendurskoðanda um Lindarhvol, sem sá um umsýslu og sölu stöðuleikaeigna sem ríkið eignaðist eftir gjaldþrot gömlu viðskiptabankanna. Í greinargerðinni gagnrýnir settur ríkisendurskoðandi skort á upplýsingagjöf um starfsemi Lindarhvols.

„Það er náttúrulega mjög alvarlegt mál. Svo þetta er það sem þarf að skoða vel og við þurfum að nýta tímann núna. Þetta tæki ekki langan tíma, við erum ekki að tala um að þing komi saman núna og sé hérna næstu vikurnar. Við þurfum bara að fara í saumana á þessu máli og taka ákvörðun um framhaldið af því að það er óumdeilt að ábyrgðin liggur hjá þinginu,“ segir Hanna Katrín.