Lýsir sex klukku­tíma bíó­ferð sem upp­lifun og hefur ekki fengið nóg

Stórmyndirnar Barbí og Oppenheimer gætu vart verið ólíkari. Önnur fjallar um barbídúkku í tilvistarkreppu en hin er sannsöguleg um kjarnorkusprengju. Engu að síður virðast þær ná til sameiginlegs markhóps sem þyrstir í að sjá báðar myndir sama kvöld. Tvennan er þá kölluð Barbenheimer sem er nýstárlegt hugtak sem fjölmargir stunduðu í gær.

Fjórðungur fór á báðar myndir

„Það voru vel rúmlega 25 prósent sem keyptu miða á báðar myndir sem er alveg stórkostlegt því Oppenheimer er ekki beint stutt mynd, hún er þrír tímar að lengd þannig þetta var prógram upp á fimm og hálfan klukkutíma en gekk rosalega vel,“ segir Konstantín Mikaelsson, framkvæmdastjóri Smárabíó.

Aðspurður hvaðan þetta sprettur segir hann að um mátt samfélagsmiðla sé að ræða.

„Við sáum þetta í fyrra á teiknimyndinni Minions þegar krakkar mættu í jakkafötum í bíó. Þetta er ekki eitthvað sem markaðssérfræðingur hjá kvikmyndaveri býr til. Þetta er bara skemmtilegi hluti samfélagsmiðla sem við sjáum þarna.“

Bleikar dragtir og búningar

Þá sé sérstaklega gaman hve margir klæði sig upp í bleikt fyrir kvikmyndina um Barbí í anda dúkkunnar.

„Fólk er bæði að koma í búningum og klætt í bleikt, í sínu fínasta taui. Það er rosalega gaman að sjá fólk í bleikum drögtum og uppstrílað. Það var mjög mikið um það í gær á forsýningunni, það er mjög gaman að sjá hvað fólk tekur þessu skemmtilega.“

Arnór Björnsson er einn þeirra sem tók Barbenheimer tvennuna svokölluðu í einum rykk í gær, fór á báðar myndir og varði því tæpum sex klukkustundum í bíói.

„Þetta eru sex tímar í heildina, það voru einhverjir sem tóku setuna svokölluðu og eru held ég með legusár í dag,“ segir Arnór.

Með setunni á hann við þá iðju að standa ekkert upp yfir Barbenheimer tvennunni sem hann mælir þó ekki með. 

Arnór ákvað að stefna fimmtíu manna hóp í Smárabíó en hugmyndina hafði hann gengið með lengi.

„Ég fékk þessa flugu í höfuðið og gat síðan ekki losað mig við hana og þá byrjaði þetta bara. Ég gat ekki sofið almennilega fyrr en ég stofnaði Facebook hóp sem heitir: 50 gaurar saman í bíó sem hafði einungis það markmið að fara fimmtíu saman í bíó.“

Eins og að reka ferðaskrifstofu

Við tók langt skipulagstímabil sem spannaði tvo mánuði og Arnór lýsir sem stormasömu.

„Mér leið eins og ég væri að reka ferðaskrifstofu því þetta var svo margt fólk og þetta var svo mikið prinsipp að fá akkúrat fimmtíu manns og það var mesta vesenið að fara hvorki yfir né undir.“

Ætlar aftur á Barbí í kvöld

Já vandasamt að passa töluna og því komust færri að en vildu. Kærasta Arnórs var meðal þeirra sem þurftu að sitja eftir með sárt ennið.

„En við erum að fara saman á Barbí í kvöld til að bæta það upp.“

Upplifunin hafi semsagt verið stórkostleg og hvetur hann alla til að taka tvennuna, en hvora myndina á maður að sjá á undan?

„Þetta fer eftir því hvort þú viljir labba úr bíóinu hafandi trú á mannkyninu eða ekki. Ef þú vilt hafa trú á mannkyninu farðu þá á Barbí eftir Oppenheimer, en sitt sýnist hverjum.“