Áfram sumar og sól í dag

Magnús Jochum Pálsson skrifar 28. júlí 2023 07:19

Það verða rólegheit í veðri næstu vikuna, sumar og sól. Vísir/Vilhelm

Það verður áfram bjart og hlýtt í suðvesturfjórðungi landsins, en norðan- og austanlands verður áfram skýjað og lítilsháttar væta. Það verður norðaustlæg átt og strekkingur á norðvestanverðu landinu og með suðausturströndinni.

Þetta segir í hugleiðingum veðurfræðings um veðrið í dag á vef Veðurstofunnar.

Hiti nær frá sjö stigum við norðausturströndina upp í átján stig suðvestanlands. Víða fimm til þrettán metrar á sekúndu.

Veðrið leikur við suðvesturhornið í dag.Veðurstofan

Á Reykjanesskaga hefur vindur verið hægbreytilegur, en eftir hádegi eigi norðanátt að hafa völdin þar og beina mengun frá eldgosinu til suðurs.

Þá bætir heldur í úrkomu austanlands í kvöld. Á morgun verður hægari austlæg eða breytileg átt. Þá verður bjart með köflum á Vesturlandi, dálítil rigning á Suðausturlandi en skýjað með köflum og stöku skúrir inn til landsins. Hiti breytist lítið.

Veðurfræðingar segja lægð suður af Íslandi stjórna veðrinu á landinu um þessar mundir en um helgina missi hún tökin og fjarlægist. Þá taki við hæg breytileg átt á öllu landinu, bjart verði með köflum en skúrir á stöku stað. Þessi rólegheit í veðri eiga síðan að standa fram í næstu viku.

Veðurhorfur á landinu næstu daga

Svona verða horfurnar á landinu næstu daga samkvæmt Veðurstofunni:

Á laugardag: Austlæg eða breytileg átt 3-8 m/s, en 5-10 með suðurströndinni. Bjartviðri á Vesturlandi, rigning af og til á Suðausturlandi, en skýjað með köflum og stöku skúrir í öðrum landshlutum. Þokuloft við norður- og austurströndina. Hiti átta til átján stig, hlýjast á Vesturlandi, en svalast í þokunni.

Á sunnudag og mánudag: Hæg breytileg átt. Bjart með köflum á landinu, en skúrir á stöku stað. Þokubakkar við norður- og austurströndina. Hiti víða tólf til sautján stig að deginum, en mun svalara í þokunni.

Á þriðjudag, miðvikudag og fimmtudag: Hæg norðlæg eða breytileg átt. Skýjað að mestu en úrkomulítið norðan- og austanlands, en víða bjart sunnan- og vestanlands og líkur á skúrum, einkum síðdegis. Heldur kólnandi norðaustantil, en annars breytist hiti lítið.

Veður

Mest lesið

Fleiri fréttir