Catalina Usme skoraði eina mark leiksins snemma í seinni hálfleik, þegar hún skrúfaði boltann í vinstra hornið eftir langa og stórkostlega sendingu frá Önu Maríu Guzmán af vinstri kantinum.
Jamaíka náði að skapa sér færi til að jafna metin og Jody Brown skallaði í tréverkið af afar stuttu færi eftir aukaspyrnu, auk þess sem Drew Spence skallaði framhjá í frábæru skallafæri á 82. mínútu.
Kólumbía hefði getað gert út um leikinn skömmu síðar þegar Usme átti frábæra sendingu inn í teiginn en Leicy Santos skallaði í stöngina.
Það kom þó ekki að sök því Kólumbíu tókst að halda út og landa sigrinum sem skilar liðinu í 8-liða úrslit í fyrsta sinn í sögunni.
Kólumbía mætir Evrópumeisturum Englands í 8-liða úrslitunum á laugardaginn.
