Dulúð umlykur dauða fjórtán ára rapparans

Slúðurmiðillinn TMZ kveðst jafnframt hafa fengið skriflega tilkynningu frá fjölskyldu Lil Tay, þar sem andlátssögum er vísað á bug. Segir þar að þau systkinin séu „örugg og á lífi“.

Í gær var greint frá dauða þeirra systkina á Instagram síðu Lil Tay en fyrir það hafði orðrómur verið á kreiki um dauða hennar. Lil Tay varð vinsæll rappari á samfélagsmiðlum árið 2018, þá aðeins níu ára gömul. Síðan þá hefur umfjöllun um misneytingu og einkennilegt samband við fjölskyldu hennar einkennt tónlistarferilinn, líkt og kom fram í fyrri frétt um málið:

Málið er allt hið undarlegasta, enda virðist það hafa tekið Lil Tay rúman sólarhring að koma því til skila að hún væri á lífi. Það hefur í raun ekki enn fengist endanlega staðfest, enda aðeins tilkynning sem TMZ kveðst hafa undir höndum, sem liggur þeirri fullyrðingu til grundvallar.

Dánartilkynningin á Instagram vakti strax grunsemdir um að eitthvað væri ekki með felldu. Þar virtist ónefndur fjölskyldumeðlimur greina frá andlátinu sem biður aðdáendur Lil Tay um frið fyrir hönd fjölskyldunnar til að syrgja þau systkinin. 

Í frétt Insider neitaði faðir þeirra, Christopher Hope, að tjá sig um andlátið eða staðfesta það. Það sama á við um umboðsmann Lil Tay, Harry Tsang. Hvorugur vildi svara því hvort hún væri á lífi.

Nú hefur Instagram færslunni verið eytt og Lil Tay þakkar Meta, rekstraraðila Instagram, fyrir að hafa veitt henni aðgang sinn að nýju, að því er fram kemur í frétt TMZ.