Viðræður Maguire við West Ham sigla í strand

West Ham komst að samkomulagi við Manchester United fyrr í sumar um að félagið myndi greiða 30 milljónir punda [um fimm milljarðar króna] fyrir varnarmanninn. Þá hafði félagið einnig náð samkomulagi við leikmanninn sjálfan um kaup og kjör og því virtist ekkert vera því til fyrirstöðu að Maguire gæti gengið í raðir Lundúnaliðsins.

Maguire hefur hins vegar ekki náð að semja við Manchester United um óuppgerðar greiðslur og forráðamenn West Ham eru farnir að þreytast á biðinni. Samkvæmt umfjöllun The Guardian um málið er Maguire sagður vilja um sjö milljónir punda fá United.

Þrátt fyrir að viðræðurnar hafi siglt í strand á þessum tímapunkti er þó ekki útilokað að þráðurinn verði tekinn upp á ný á næstu dögum. Eins og staðan er núna er West Ham þó í leit að miðverði og félagið er farið að velta fyrir sér öðrum möguleikum en Harry Maguire.