Hælis­leit­endur ekki fengið pláss í Konu­koti

Halldóra R. Guðmundsdóttir, forstöðukona Konukots, segir þau ekki hafa getað tekið við þjónustusviptum konum á flótta en að það hafi mikið verið leitað til þeirra vegna þeirra í liðinni viku. Konukoti beri að fara eftir lögum um félagsþjónustu sveitarfélaga og sé með þjónustusamning við Reykjavíkurborg sem stjórnendum beri að fylgja.  

Félagsmálaráðherra og fulltrúa sveitarfélaga greinir á um hvort hælisleitendur sem sviptir hafa verið þjónustu ríkisins eftir endanlega synjun um hæli eigi rétt á félagsþjónustu og telja sveitarfélögin svo ekki vera. Halldóra segir að það taki mjög á starfsfólk Konukots að þurfa að vísa hælisleitendum frá. 

„Við erum náttúrulega bara sérhæfð í þjónustu við heimilislausa með miklar og flóknar þjónustuþarfir svo við erum ekki með sérþekkingu á þessu en auðvitað hefur maður áhyggjur af öllum sem hafa í engin hús að venda,“ segir Halldóra. 

Ekki nógu mörg rúm fyrir alla

Halldóra segir að aðsókn hafi verið mjög mikil í Konukot og aukist mjög síðustu tvö árin.

„Það var hundrað prósent nýting í júlí og allt að sextán konur í húsi. Við erum með tólf rúm þannig við erum mjög mikið að deila La-Z-Boy-stólunum og allskonar svo fólk geti hallað sér þegar rúmin eru full,“ bætir Halldóra við. Erfitt sé að fá næði í húsinu og lítið þurfi til að raska jafnvæginu.

„Eitt atvik hefur áhrif á allt húsið og svo eru konur sem leita hingað eru oft með mjög langa áfallasögu og það þarf lítið til að vekja upp áfallaviðbrögð og það brýst út í alls konar hegðun sem við skiljum ekkert endilega.“ Því komi stundum upp atvik í Konukoti en áfallamiðuð nálgun hafi reynst vel í starfinu. 

„Við reynum að fyrirbyggja uppákomur og atvikum hefur fækkað á sama tíma og nýtingin hefur aukist.“

Sakni þess að geta sótt í önnur úrræði

Halldóra segir að fyrir konur séu margar hættur á götunni og þær séu sérstaklega útsettar fyrir hvers kyns ofbeldi.

„Það er ekkert algengt að konur sem glíma við heimilisleysi séu kannski að sofa úti á götunni en það þýðir líka að þær eru að redda sér gistingu hér og þar, oft í ótryggum aðstæðum og þar náttúrulega getur maður ímyndað sér að það sé kannski ekki allt eins og það á að vera og þær eru mjög útsettar fyrir ofbeldi þar.“

Hún bætir við að skjólstæðingar þeirra sakni þess mjög að geta sótt í önnur úrræði, eins og neyslurýmið Ylju sem lokaði fyrir hálfu ári.

Meira hafi borið á alvarlegum sýkingum eftir að neyslurýminu var lokað og gestir Konukots lent oftar upp á spítala. Einnig sakni konurnar félagslega og andlega stuðningsins sem þær hafi fengið í Ylju.

„Það er svo rosalega mikilvægt fyrir þennan hóp að hafa fleiri staði til að fara á en að vera bara í neyðarskýli því að hér eru gestir í neyð en í Ylju, Frú Ragnheiði og fleiri stöðum þá fá þær tækifæri til að mæta á eigin forsendum með hreinan skjöld, hitta ný andlit og ég finn talað rosalega mikið um það hvað þær sakna þess að geta leitað til þeirra,“ sagði forstöðukona Konukots en borgin framlengdi samning við Rótina um rekstur þess í vikunni.

Fréttin hefur verið uppfærð.