Selma sýnir á sér skugga­hliðar

Rúmlega fimm þúsund áhorfendur sá myndina um frumsýningarhelgina og hefur bæst við fjöldann síðan. 

Tekin upp á óþægilegu eyðibýli

Einvala lið leikara og listrænna stjórnenda koma að gerð kvikmyndarinnar sem var skotin á síðasta ári. Myndin gerist á tveimur tímabilum og er hoppað á milli þeirra. Annars vegar í nútímanum á höfuðborgarsvæðinu og hins vegar á Staðafelli í Dölunum, ansi hreint draugalegum og óþægilegum stað svo ekki sé meira sagt. Að minnsta kosti eins og staðurinn birtist í myndinni.

Erlingur Óttar Thoroddsen leikstýrir myndinni en hann er jafnframt handritshöfundur leikgerðar. 

Þau Jóhannes Haukur Jóhannesson, Selma Björnsdóttir, Elín Hall, Mikael Kaaber, Sara Dögg Ásgeirsdóttir og Halldóra Geirharðsdóttir fara með helstu aðalhlutverk. Leikstjórinn segir það hafa verið unun að vinna með svo hæfileikaríkum hópi listafólks. 

Dauðsföll á unglingaheimili

Til þess að spilla sem minnstu fyrir lesendum Vísis hverfist sagan í kringum áratuga gömul dauðsföll á unglingaheimili, óuppgerð ósætti og óhugnalega atburði. 

Eins og svo oft í spennusögum skiptist tímalína myndarinnar í tvennt. Annars vegar á höfuðborgarsvæðinu í dag og hins vegar á níunda áratug síðustu aldar. Áhorfendur fylgjast með Óðni, leiknum af Jóhannesi Hauki, rannsaka áratuga gömul dauðsföll á unglingaheimili. 

Þá fer hann að gruna að óhugnalegir atburðir þaðan tengist dularfullu andláti eiginkonu sinnar, sem og skringilegri hegðun táningsdóttur hans. Eftir því sem Óðinn uppgötvar dýpt málsins fara enn óhuggulegri hlutir að skýrast.

Erlingur hefur augljóslega verið með nálaraugað á lofti við leikaraval myndarinnar en mikill hluti leikarahópsins samanstendur af upprennandi hæfileikafólki sem lætur ljós sítt skína. Á sama tíma er gleðilegt að sjá eldri kanónur á borð við Kristbjörgu Kjeld glitra á hvíta tjaldinu. 

Áskorun að leika þessa konu

Söng -og leikkonan Selma Björnsdóttir hefur undanfarin ár fengist mikið við leikaraval fyrir ýmiskonar kvikmyndir og þáttagerð samhliða veislustjórn og tónlistarflutningi en að þessu sinni smellti hún sér fyrir framan við kvikmyndatökuvélina. 

Í myndinni sýnir hún á sér glænýjar hliðar sem hin grimma forstöðukona, Lilja. Spurð hvaðan hún hafi sótt innblástur fyrir hlutverkið segir Selma hann ekki hafa komið frá neinum einum ákveðnum stað. 

„Karakterinn lifnaði að vissu leyti við þegar ég las handritið. Hennar senur, hvað hún gerir og segir en sömuleiðis hvað aðrir segja um hana og hvernig persónurnar haga sér í kringum hana. Þetta hafði allt áhrif á það hvernig persóna hennar kviknaði í kollinum á mér og varð til.“

Hún segir samstarfið við Erling hafa verið gott og gefandi. „Við Erlingur áttum mörg góð samtöl þar sem hann upplýsti mig um sýnar pælingar og hvert hann vildi stefna en gaf mér á sama tíma alltaf mitt frelsi til túlkunar. 

Það var vissulega mikil áskorun að leika þessa konu en heilt yfir fannst mér það alveg frábært og á sama tíma lærði ég helling.“

Gamalt hryllingsmyndanörd

Nú minnir karakter Lilju svolítið á persónur á borð við Nurse Rattched eða Kathy Bates í Misery. Var það meðvituð nálgun?

„Alls ekki. Ég er ekki fædd í gær og var mikið hryllingsmyndanörd í gamla daga. Ég var mjög snemma búin með allar hryllingsmyndirnar á helstu myndbandaleigum borgarinnar svo ég er nokkuð vel að mér í þessum eldri hrollvekjum.“

Spurð hvort það sé satt að hressustu og skemmtilegustu kvikmyndasettin séu við gerð hryllingsmynda segir Selma stemninguna hafa verið góða. 

„Það var vissulega hress og skemmtileg stemning, sérstaklega í smink-herberginu þar sem við dvöldum á milli taka. Fagmennskan var alltaf í fyrirrúmi á settinu sjálfu en auðvitað alltaf stutt í húmorinn. 

Það var svo skemmtilegt að leika á móti þessum upprennandi stjörnum. Þau eru öll alveg frábær og algjörir snillingar.“

Hefði ekki verið jólalegt að taka hana heim

Persóna Lilju, í meðförum Selmu, er sem fyrr segir ekki sú geðþekkasta en oft er talað um að leikarar, sérstaklega þeir sem aðhyllast method acting, festist tímabundið í karakternum sem þeir leika hverju sinni. Selma segist blessunarlega ekki hafa tekið persónu Lilju með sér heim að loknum tökudegi. 

„Sem betur fer fóru tökurnar fram úti á landi svo ég skildi hana Lilju eftir þar þegar ég fór heim. Við tókum myndina upp á aðventunni og það hefði ekki verið mjög jólalegt að taka Lilju með heim í jólastemninguna.“

Selma og Björn Stefánsson ræddu tökurnar á Kulda og margt fleira, meðal annars jólin, í Bakaríinu á Bylgjunni um síðustu helgi.