McCarthy í basli og þingið lamað

Fimm þingmenn Repúblikanaflokksins, sem tilheyra hópi sem á ensku kallast House Freedom Caucus, greiddu atkvæði gegn því að frumvarpið, sem samið var af öðrum Repúblikönum, yrði tekið til umræðu.

McCarthy reyndi að fá frumvarpið samþykkt í síðustu viku en dró það til baka skömmu fyrir fyrstu atkvæðagreiðsluna. Þá bætti hann við frumvarpið ákvæðum um niðurskurð á ýmsum sviðum og aukin fjárútlát vegna eftirlits við landamærin við Mexíkó sem leiddi til þess að frumvarpið hefði líklega aldrei farið í gegnum öldungadeildina.

AP fréttaveitan segir að til deilna hafi komið um frumvarpið á gólfi þingsins en þetta er hefðbundið frumvarp sem á iðulega greiða leið í gegnum þingið. Að endingu fór atkvæðagreiðslan 212-214.

Þingmennirnir hafa einnig gagnrýnt McCarthy harðlega og segjast vilja sjá ítarlega áætlun frá McCarthy um fjárútlát.

Meðlimir fulltrúadeildarinnar standa frammi fyrir því að þurfa að samþykkja umfangsmikið frumvarp um fjármögnun ríkisreksturs Bandaríkjanna fyrir 30. september. Náist það ekki þarf að stöðva rekstur ríkisins, með tilheyrandi truflunum fyrir opinbera starfsmenn og almenna íbúa í Bandaríkjunum.

Þingmaðurinn Mike Lawler, Repúblikani, ræddi við fjölmiðla í gær þar sem hann fór hörðum orðum um samstarfsmenn sína. Hann gagnrýndi þá fyrir að vilja stöðva rekstur ríkisins og líkti þeim við trúða og brjálæðinga.

Erfiður hópur þingmanna

Repúblikanar eru með mjög nauman meirihluta í fulltrúadeildinni og McCarthy hefur átt í miklum vandræðum með hóp öfgaö-hægri meðlima flokksins. Hann þurfti að verða við mörgum kröfum þeirra til að fá embætti þingforseta eftir ítrekaðar atkvæðagreiðslur og samningaviðræður.

Síðan þá hafa þessir þingmenn ítrekað gefið í skyn að þeir gætu velt honum úr sessi, hvenær sem er. Ein af þeim kröfum sem McCarthy varð við til að verða þingforseti var að nú þarf eingöngu einn þingmaður að lýsa yfir vantrausti gegn honum til að atkvæðagreiðsla um vantraust fari fram.

McCarthy lét nýverið eftir þessum þingmönnum og sagði að Repúblikanar ætluðu að hefja formlega rannsókn á Joe Biden, forseta, og því hvort hann hefði brotið af sér í embætti. Því lýsti hann yfir án þess að halda atkvæðagreiðslu á þinginu um hvort tilefni væri til þess, eins og hann hafði áður sagt að rétt væri að gera. Óljóst er hvort hann hefði yfir höfuð nægilegan stuðning innan eigin þingflokks til að slík tillaga yrði samþykkt.

Telur stöðvun koma niður á flokknum

Í frétt AP segir að McCarthy hafi ítrekað fyrir þingflokki sínum í gær að stöðvun ríkisrekstursins myndi koma niður á flokknum í kosningum næsta árs. Á fundi þingflokksins sagði McCarthy að frumvarpinu hefði verið áætlað að veita þeim aukinn tíma til að ræða málin frekar.

Þó nokkrir þingmenn eru þó sagðir hafa tekið til máls og sagt MacCarthy að núverandi áætlun hans hefði ekki nægan stuðning.

Áætlun McCarthy snýst um að tryggja rekstur ríkisins í einn mánuð. Frumvarpið myndi skikka forsvarsmenn ýmissa stofnana til að skera niður um átta prósent. Þann tíma vill McCarthy nota til að semja og samþykkja ítarlegrar og langvarandi frumvarp.

Washington Post segir hófstillta Repúblikana, og sérstaklega þingmenn í kjördæmum sem Biden vann árið 2020, segja að þeir hafi ekki ástæðu til að verða við kröfum áðurnefndra öfgamanna á þingi um frekari niðurskurði. Þessir þingmenn saka öfgamennina um að breyta kröfum sínum sífellt eftir að þingmenn vörðu mánuðum í að semja tólf frumvörp sem byggðu á samkomulagi sem McCarthy og Biden gerðu í vor.

Það samkomulag kom í veg fyrir það að Bandaríkin færu í greiðsluþrot í fyrsta sinn og fól í sér að ríkisútgjöld til stofnanna, annarra en herafla Bandaríkjanna, yrðu ekkert aukin á næsta ári og aðeins aukin um eitt prósent árið 2025.

Einn þessara svokölluðu hófstilltu þingmanna segir óþarft að kjósa um önnur frumvörp, án þess að þetta verði samþykkt. Frumvarpið um fjárútlát til varnarmála sé það vinsælasta og í senn auðveldasta að samþykkja. Geti Repúblikanar það ekki, þurfi ekki að greiða atkvæði um önnur frumvörp.

Demókratar undirbúa sig fyrir stöðvun

Demókratar eru byrjaðir að undirbúa sig fyrir stöðvun ríkisreksturs Bandaríkjanna, þar sem leiðtogar flokksins telja, samkvæmt frétt Politico, að Repúblikanar muni ekki ná að stilla saman strengi sína. Spurningin sé eingöngu hve löng stöðvunin muni vera.

Heimildarmenn miðilsins úr röðum Demókrata segja að á þeim bæ sé málið litið þannig að finnist lausn á deilunni, verði Demókratar líklega þurfa að koma að henni.

„Ef hann [McCarthy] þarf að losa smá blóð og stöðva rekstur ríkisins, okei. En við vitum öll að það sem mun gerast á endanum er að það verður einhverskonar samkomulag milli flokka,“ sagði einn Demókrati.

Innan þingflokks Demókrata eru umræður um hvernig slíkt samkomulag gæti litið út þegar byrjaðar.

Í Hvíta húsinu hafa línurnar verið lagðar á þann veg að þrýst verður á McCarthy að standa við samkomulagið sem hann gerði við Biden í vor. Því samkomulagi lýsti McCarthy upprunalega sem miklum sigri fyrir íhaldsmenn áður en hann reyndi að fjarlægja sig frá samkomulaginu í kjölfar gagnrýni frá hans hægri sinnuðustu þingmönnum.

Bæði þingmenn Hvíta hússins og starfsmenn Hvíta hússins eru þó sammála um að áhersla verði lögð á að ítreka oft og reglulega fyrir bandarísku þjóðinni að Repúblikanar beri ábyrgð á stöðvun ríkisrekstursins. Óreiða í Repúblikanaflokknum komi niður á bandarísku þjóðinni og stöðvi mikilvægar innviðaframkvæmdir.